ਹੇਮਿੰਗਫੋਰਡ ਨੇੜੇ ਰਾਤ ਨੂੰ ਬਾਰਡਰ ਪਾਰ ਕਰਨ ਦੀ ਕੋਸ਼ਿਸ਼, ਹਾਈਪੋਥਰਮੀਆ ਨਾਲ ਪੀੜਤ ਮਿਲੇ 8 ਲੋਕ

ਕਿਊਬੈਕ, ਹੇਮਿੰਗਫੋਰਡ ਨੇੜੇ ਕਿਊਬੈਕ ਦੇ ਮੋਂਟੇਰੇਜੀ ਖੇਤਰ ਵਿੱਚ ਸ਼ੁੱਕਰਵਾਰ ਰਾਤ ਨੂੰ 8 ਲੋਕ ਗੈਰਕਾਨੂੰਨੀ ਤਰੀਕੇ ਨਾਲ ਅਮਰੀਕਾ ਤੋਂ ਕੈਨੇਡਾ ਵਿੱਚ ਦਾਖ਼ਲ ਹੋ ਗਏ। ਰਾਇਲ ਕੈਨੇਡੀਅਨ ਮਾਊਂਟਡ ਪੁਲਿਸ (RCMP) ਅਨੁਸਾਰ, ਇਹ ਗਰੁੱਪ ਰਾਤ ਕਰੀਬ 9:30 ਵਜੇ ਅਮਰੀਕੀ ਬਾਰਡਰ ਸਿਸਟਮ ਦੀ ਨਜ਼ਰ ਵਿੱਚ ਆਇਆ ਸੀ, ਪਰ ਤੁਰੰਤ ਉਨ੍ਹਾਂ ਦੀ ਪਹਿਚਾਣ ਅਤੇ ਰੋਕਥਾਮ ਨਹੀਂ ਹੋ ਸਕੀ।
RCMP ਨੇ ਦੱਸਿਆ ਕਿ ਸਵੇਰੇ ਤਕਰੀਬਨ 3:30 ਵਜੇ ਇੱਕ ਵਿਅਕਤੀ ਨੂੰ ਰੋਕਿਆ ਗਿਆ, ਜੋ ਇਸ ਗਰੁੱਪ ਨੂੰ ਕੈਨੇਡਾ ਲਿਆਉਣ ਵਿੱਚ ਮਦਦ ਕਰ ਰਿਹਾ ਸੀ। ਇਸ ਤੋਂ ਬਾਅਦ ਬਾਕੀ 7 ਲੋਕ ਵੱਖ-ਵੱਖ ਥਾਵਾਂ ਤੋਂ ਮਿਲੇ, ਜੋ ਹਾਈਪੋਥਰਮੀਆ ਅਤੇ ਫਰਾਸਟਬਾਈਟ ਦੇ ਲੱਛਣਾਂ ਨਾਲ ਗੰਭੀਰ ਹਾਲਤ ਵਿੱਚ ਸਨ।
ਆਖਰੀ ਵਿਅਕਤੀ ਨੂੰ ਸੂਰੇਟੇ ਦੁ ਕਿਊਬੈਕ ਅਤੇ RCMP ਦੀ ਡ੍ਰੋਨ ਟੀਮ ਦੀ ਸਾਂਝੀ ਕਾਰਵਾਈ ਨਾਲ ਸਵੇਰੇ ਕਰੀਬ 7:30 ਵਜੇ ਲੱਭ ਕੇ ਬਚਾਇਆ ਗਿਆ। ਪੁਲਿਸ ਮੁਤਾਬਕ, ਸਾਰੇ 8 ਲੋਕਾਂ ਨੂੰ ਤੁਰੰਤ ਇਲਾਜ ਲਈ ਹਸਪਤਾਲ ਭੇਜਿਆ ਗਿਆ ਹੈ। ਉਨ੍ਹਾਂ ਦੀ ਅੱਗੇ ਦੀ ਕਾਰਵਾਈ ਅਤੇ ਇਮੀਗ੍ਰੇਸ਼ਨ ਪ੍ਰਕਿਰਿਆ ਕੈਨੇਡਾ ਬਾਰਡਰ ਸਰਵਿਸ ਏਜੰਸੀ (CBSA) ਵੱਲੋਂ ਕੀਤੀ ਜਾਵੇਗੀ।
ਜ਼ਿਕਰਯੋਗ ਹੈ ਕਿ ਅਜਿਹੀ ਹੀ ਇਕ ਘਟਨਾ ਕ੍ਰਿਸਮਸ ਦੇ ਦਿਨ ਵੀ ਵਾਪਰੀ ਸੀ, ਜਦੋਂ RCMP ਨੇ ਹੈਵਲਾਕ ਖੇਤਰ ਰਾਹੀਂ ਗੈਰਕਾਨੂੰਨੀ ਤੌਰ ’ਤੇ ਦਾਖ਼ਲ ਹੋ ਰਹੇ 19 ਹਾਈਟੀਅਨ ਮਾਈਗ੍ਰੈਂਟਾਂ ਨੂੰ ਰੋਕ ਕੇ ਦੇਸ਼ ਭੇਜ ਦਿੱਤਾ ਸੀ। RCMP ਨੇ ਮੁੜ ਚੇਤਾਵਨੀ ਦਿੱਤੀ ਹੈ ਕਿ ਸਰਦੀਆਂ ਦੇ ਮੌਸਮ ਵਿੱਚ ਬਾਰਡਰ ਪਾਰ ਕਰਨ ਦੀ ਕੋਸ਼ਿਸ਼ ਬਹੁਤ ਖਤਰਨਾਕ ਸਾਬਤ ਹੋ ਸਕਦੀ ਹੈ, ਕਿਉਂਕਿ ਅਕਸਰ ਲੋਕ ਤੀਖੀ ਠੰਡ ਅਤੇ ਮੌਸਮੀ ਹਾਲਾਤਾਂ ਲਈ ਤਿਆਰ ਨਹੀਂ ਹੁੰਦੇ।