ਭਾਰਤ ਅਤੇ ਰੂਸ ਵੱਲੋਂ ਸਿਵਲ ਯਾਤਰੀ ਜਹਾਜ਼ਾਂ ਦੇ ਸਾਂਝੇ ਨਿਰਮਾਣ 'ਤੇ ਵਿਚਾਰ-ਚਰਚਾ, ਹਵਾਬਾਜ਼ੀ ਖੇਤਰ 'ਚ ਵਧੇਗਾ ਸਹਿਯੋਗ

ਭਾਰਤ ਵਿੱਚ ਖੇਤਰੀ ਹਵਾਈ ਸੰਪਰਕ (Regional Connectivity) ਦੀ ਵਧਦੀ ਮੰਗ ਨੂੰ ਪੂਰਾ ਕਰਨ ਲਈ ਭਾਰਤ ਅਤੇ ਰੂਸ ਨੇ ਸਿਵਲ ਯਾਤਰੀ ਜਹਾਜ਼ਾਂ ਦੇ ਸਾਂਝੇ ਨਿਰਮਾਣ ਵੱਲ ਕਦਮ ਵਧਾ ਦਿੱਤੇ ਹਨ। ਭਾਰਤ ਦੇ ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਰਾਮ ਮੋਹਨ ਨਾਇਡੂ ਨੇ ਵੀਰਵਾਰ ਨੂੰ ਰੂਸ ਦੇ ਉਦਯੋਗ ਅਤੇ ਵਪਾਰ ਮੰਤਰੀ ਐਂਟਨ ਅਲੀਖਾਨੋਵ ਨਾਲ ਨਵੀਂ ਦਿੱਲੀ ਵਿਖੇ ਇੱਕ ਮਹੱਤਵਪੂਰਨ ਬੈਠਕ ਕੀਤੀ, ਜਿਸ ਵਿੱਚ ਦੋਵਾਂ ਦੇਸ਼ਾਂ ਵਿਚਾਲੇ ਜਹਾਜ਼ ਨਿਰਮਾਣ ਦੇ ਖੇਤਰ ਵਿੱਚ ਸਹਿਯੋਗ ਵਧਾਉਣ 'ਤੇ ਚਰਚਾ ਹੋਈ। ਬੈਠਕ ਤੋਂ ਬਾਅਦ ਕੇਂਦਰੀ ਮੰਤਰੀ ਨਾਇਡੂ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' (X) 'ਤੇ ਜਾਣਕਾਰੀ ਸਾਂਝੀ ਕਰਦਿਆਂ ਦੱਸਿਆ ਕਿ ਭਾਰਤ ਵਿੱਚ ਖੇਤਰੀ ਸੰਪਰਕ ਦੀਆਂ ਅਥਾਹ ਸੰਭਾਵਨਾਵਾਂ ਹਨ। ਉਨ੍ਹਾਂ ਕਿਹਾ ਕਿ ਭਾਰਤ ਅਤੇ ਰੂਸ ਕੋਲ ਆਪਣੇ ਰਵਾਇਤੀ ਖਰੀਦਦਾਰ-ਵਿਕਰੇਤਾ ਸਬੰਧਾਂ ਤੋਂ ਅੱਗੇ ਵਧ ਕੇ ਸਾਂਝੇ ਉਤਪਾਦਨ ਅਤੇ ਡੂੰਘੇ ਉਦਯੋਗਿਕ ਸਹਿਯੋਗ ਵੱਲ ਵਧਣ ਦਾ ਵਧੀਆ ਮੌਕਾ ਹੈ। ਉਨ੍ਹਾਂ ਦੋਹਰਾਇਆ ਕਿ ਦੋਵਾਂ ਦੇਸ਼ਾਂ ਦੀ ਰਣਨੀਤਕ ਭਾਈਵਾਲੀ ਵਿੱਚ ਹਵਾਬਾਜ਼ੀ ਖੇਤਰ ਇੱਕ ਮੁੱਖ ਥੰਮ੍ਹ ਵਜੋਂ ਉੱਭਰ ਰਿਹਾ ਹੈ। ਇਸ ਪਹਿਲਕਦਮੀ ਤਹਿਤ ਭਾਰਤ ਦੀ ਜਨਤਕ ਖੇਤਰ ਦੀ ਏਰੋਸਪੇਸ ਕੰਪਨੀ 'ਹਿੰਦੁਸਤਾਨ ਏਰੋਨਾਟਿਕਸ ਲਿਮਿਟੇਡ' (HAL) ਅਤੇ ਰੂਸ ਦੀ 'ਯੂਨਾਈਟਿਡ ਏਅਰਕ੍ਰਾਫਟ ਕਾਰਪੋਰੇਸ਼ਨ' (UAC) ਵਿਚਾਲੇ ਸੁਪਰਜੈੱਟ (SJ-100) ਸਿਵਲ ਯਾਤਰੀ ਜਹਾਜ਼ ਦੇ ਲਾਇਸੰਸਸ਼ੁਦਾ ਸਾਂਝੇ ਉਤਪਾਦਨ ਅਤੇ ਸਹਾਇਤਾ ਲਈ ਸ਼ੁਰੂਆਤੀ ਸਮਝੌਤਾ ਪਹਿਲਾਂ ਹੀ ਹੋ ਚੁੱਕਾ ਹੈ। ਇਸ ਵੇਲੇ ਸਥਾਨਕ ਪੱਧਰ 'ਤੇ ਨਿਰਮਾਣ (ਲੋਕਲਾਈਜ਼ੇਸ਼ਨ) ਨੂੰ ਲੈ ਕੇ ਚੱਲ ਰਹੀ ਗੱਲਬਾਤ ਅੰਤਿਮ ਪੜਾਅ 'ਤੇ ਹੈ। ਇਨ੍ਹਾਂ ਪ੍ਰਸਤਾਵਿਤ ਸੌਦਿਆਂ ਤਹਿਤ ਭਾਰਤੀ ਹਵਾਈ ਸੇਵਾ ਓਪਰੇਟਰਾਂ ਜਿਵੇਂ ਪਿਨੈਕਲ ਏਅਰ, ਏਅਰ ਕੇਰਲਾ ਅਤੇ ਸਲੀਕ ਏਵੀਏਸ਼ਨ ਨੂੰ 105 ਖੇਤਰੀ ਟਰਬੋਪ੍ਰੌਪ ਜਹਾਜ਼ਾਂ ਦੀ ਸਪਲਾਈ ਕੀਤੇ ਜਾਣ ਦੀ ਯੋਜਨਾ ਸ਼ਾਮਲ ਹੈ। ਜ਼ਿਕਰਯੋਗ ਹੈ ਕਿ ਨਵੀਂ ਦਿੱਲੀ ਵਿੱਚ 9 ਤੋਂ 11 ਸਤੰਬਰ ਤੱਕ ਆਯੋਜਿਤ ਹੋ ਰਹੇ 'ਇਨੋਪ੍ਰੋਮ ਇੰਡੀਆ' (Innoprom India) ਸਮਾਗਮ ਦੌਰਾਨ ਰੂਸ ਨੇ ਆਪਣੇ ਖੇਤਰੀ ਜਹਾਜ਼ਾਂ SJ-100, MC-21 ਅਤੇ Il-114-300 ਦਾ ਪ੍ਰਦਰਸ਼ਨ ਕੀਤਾ ਹੈ। ਇਹ ਸਹਿਯੋਗ ਅਜਿਹੇ ਸਮੇਂ ਹੋ ਰਿਹਾ ਹੈ ਜਦੋਂ ਰੂਸ ਮਿਗ (MiG) ਅਤੇ ਸੁਖੋਈ (Sukhoi) ਵਰਗੇ ਰਵਾਇਤੀ ਰੱਖਿਆ ਪਲੇਟਫਾਰਮਾਂ ਤੋਂ ਇਲਾਵਾ ਸਿਵਲ ਹਵਾਬਾਜ਼ੀ ਖੇਤਰ ਵਿੱਚ ਵੀ ਭਾਰਤ ਨਾਲ ਸਾਂਝੀਦਾਰੀ ਦਾ ਵਿਸਥਾਰ ਕਰਨਾ ਚਾਹੁੰਦਾ ਹੈ।