ਫੁਕੇਟ-ਦਿੱਲੀ ਏਅਰ ਇੰਡੀਆ ਉਡਾਣ: AAIB ਦੀ ਰਿਪੋਰਟ ’ਚ ਵੱਡੇ ਖੁਲਾਸੇ

ਫੁਕੇਟ ਤੋਂ ਦਿੱਲੀ ਆ ਰਹੀ ਏਅਰ ਇੰਡੀਆ ਦੀ ਉਡਾਣ (ਏ320 ਜਹਾਜ਼) ਦੌਰਾਨ 4 ਅਗਸਤ ਨੂੰ ਵਾਪਰੀ ਭਿਆਨਕ ਘਟਨਾ ਬਾਰੇ ਏਅਰਕ੍ਰਾਫਟ ਐਕਸੀਡੈਂਟ ਇਨਵੈਸਟੀਗੇਸ਼ਨ ਬਿਊਰੋ (AAIB) ਨੇ ਆਪਣੀ ਮੁਢਲੀ ਰਿਪੋਰਟ ਜਾਰੀ ਕਰ ਦਿੱਤੀ ਹੈ। ਰਿਪੋਰਟ ਮੁਤਾਬਕ ਕੁਝ ਸਕਿੰਟਾਂ ਵਿੱਚ ਜਹਾਜ਼ ਦੇ ਤਿੰਨੋਂ ਹਾਈਡ੍ਰੌਲਿਕ ਸਿਸਟਮਾਂ ਦਾ ਦਬਾਅ ਅਚਾਨਕ ਖਤਮ ਹੋ ਗਿਆ, ਜਿਸ ਨਾਲ ਆਟੋਪਾਇਲਟ ਬੰਦ ਹੋ ਗਿਆ ਅਤੇ ਸਟਾਲ ਵਾਰਨਿੰਗ ਵੱਜਣ ਲੱਗੀ। ਇਸ ਕਾਰਨ ਜਹਾਜ਼ ਆਪਣੀ ਨਿਰਧਾਰਤ ਉਚਾਈ ਤੋਂ 664 ਫੁੱਟ ਉੱਪਰ-ਹੇਠਾਂ ਖਿਸਕ ਗਿਆ। ਉਡਾਣ ਵਿੱਚ 137 ਯਾਤਰੀਆਂ ਅਤੇ 8 ਅਮਲੇ ਦੇ ਮੈਂਬਰਾਂ ਸਮੇਤ ਕੁੱਲ 145 ਲੋਕ ਸਵਾਰ ਸਨ। ਇਸ ਉਥਲ-ਪੁਥਲ ਕਾਰਨ 20 ਯਾਤਰੀਆਂ ਅਤੇ 4 ਕੈਬਿਨ ਕਰੂ ਮੈਂਬਰਾਂ ਸਮੇਤ 24 ਲੋਕ ਜ਼ਖ਼ਮੀ ਹੋਏ, ਜਿਨ੍ਹਾਂ ਵਿੱਚੋਂ 4 ਦੀ ਹਾਲਤ ਗੰਭੀਰ ਰਹੀ ਅਤੇ ਉਨ੍ਹਾਂ ਨੂੰ ਹਸਪਤਾਲ ਦਾਖਲ ਕਰਵਾਉਣਾ ਪਿਆ। ਹਾਦਸੇ ਦੀ ਤੀਬਰਤਾ ਇੰਨੀ ਜ਼ਿਆਦਾ ਸੀ ਕਿ ਕੈਬਿਨ ਦੀ ਛੱਤ ਦੇ ਪੈਨਲ ਟੁੱਟ ਗਏ, ਓਵਰਹੈੱਡ ਬਿਨ ਉਖੜ ਗਏ ਅਤੇ ਬਾਥਰੂਮ ਦਾ ਕਮੋਡ ਤੱਕ ਹਿੱਲ ਗਿਆ। ਜਾਂਚ ਦੌਰਾਨ ਇੱਕ ਹੋਰ ਸੰਵੇਦਨਸ਼ੀਲ ਮਾਮਲਾ ਸਾਹਮਣੇ ਆਇਆ ਕਿ 34 ਸਾਲਾ ਮੁੱਖ ਪਾਇਲਟ ਦੇ ਖੂਨ ਦੇ ਟੈਸਟਾਂ ਵਿੱਚ "ਨਾਨ-ਨੈਗੇਟਿਵ" ਨਤੀਜਾ ਮਿਲਿਆ, ਜਦੋਂ ਕਿ ਸਹਿ-ਪਾਇਲਟ ਦੀ ਰਿਪੋਰਟ ਨੈਗੇਟਿਵ ਰਹੀ। AAIB ਨੇ ਇਸਨੂੰ ਗੰਭੀਰ ਚਿੰਤਾ ਦਾ ਵਿਸ਼ਾ ਮੰਨਦਿਆਂ DGCA ਨੂੰ ਅਜਿਹੇ ਪਦਾਰਥਾਂ ਦੀ ਵਰਤੋਂ ਰੋਕਣ ਲਈ ਤੁਰੰਤ ਕਦਮ ਚੁੱਕਣ ਦੀ ਸਿਫਾਰਸ਼ ਕੀਤੀ ਹੈ। ਇਸ ਤੋਂ ਇਲਾਵਾ, ਜਹਾਜ਼ ਦੇ ਰੱਖ-ਰਖਾਅ ’ਤੇ ਵੀ ਸਵਾਲ ਉਠੇ ਹਨ। ਸਾਹਮਣੇ ਆਇਆ ਹੈ ਕਿ ਹਾਦਸੇ ਵਾਲਾ ਜਹਾਜ਼ (VT-EXO) 28 ਜੁਲਾਈ ਤੋਂ ਹੀ ਪਾਵਰ ਟਰਾਂਸਫਰ ਯੂਨਿਟ (PTU) ਵਿੱਚ ਨੁਕਸ ਦੇ ਬਾਵਜੂਦ ਉਡਾਣ ਭਰ ਰਿਹਾ ਸੀ। ਹਾਲਾਂਕਿ ਇਸ ਨੁਕਸ ਨੂੰ ਸਿੱਧੇ ਤੌਰ ’ਤੇ ਹਾਦਸੇ ਦਾ ਕਾਰਨ ਨਹੀਂ ਮੰਨਿਆ ਗਿਆ, ਪਰ ਹਾਈਡ੍ਰੌਲਿਕ ਪੁਰਜ਼ਿਆਂ ਦੀ ਤਕਨੀਕੀ ਜਾਂਚ ਜਾਰੀ ਹੈ। ਫਰਾਂਸ ਤੋਂ ਆਏ ਏਅਰਬੱਸ ਦੇ ਮਾਹਰਾਂ ਨੇ ਵੀ ਦਿੱਲੀ ਵਿੱਚ ਜਹਾਜ਼ ਦਾ ਮੁਆਇਨਾ ਕੀਤਾ। ਰਿਪੋਰਟ ਵਿੱਚ ਸਕਿੰਟ-ਦਰ-ਸਕਿੰਟ ਘਟਨਾਕ੍ਰਮ ਦਰਜ ਹੈ। 04:02:43 (UTC) ’ਤੇ ਗ੍ਰੀਨ ਹਾਈਡ੍ਰੌਲਿਕ ਸਿਸਟਮ ਫੇਲ੍ਹ ਹੋਇਆ, 4 ਸਕਿੰਟ ਬਾਅਦ ਬਲੂ ਅਤੇ ਯੈਲੋ ਸਿਸਟਮ ਵੀ ਬੰਦ ਹੋ ਗਏ। 04:02:48 ’ਤੇ ਆਟੋਪਾਇਲਟ ਡਿਸਕਨੈਕਟ ਹੋ ਗਿਆ ਅਤੇ ਚੇਤਾਵਨੀ ਘੰਟੀ ਵੱਜਣ ਲੱਗੀ। ਜਹਾਜ਼ ਪਹਿਲਾਂ 372 ਫੁੱਟ ਉੱਪਰ ਗਿਆ ਅਤੇ ਫਿਰ 292 ਫੁੱਟ ਹੇਠਾਂ ਡਿੱਗਿਆ। ਕੁਝ ਸਮੇਂ ਬਾਅਦ ਸਿਸਟਮ ਆਪਣੇ ਆਪ ਠੀਕ ਹੋ ਗਏ, ਜਿਸ ਤੋਂ ਬਾਅਦ ਪਾਇਲਟਾਂ ਨੇ ਦਿੱਲੀ ਵੱਲ ਸਫ਼ਰ ਜਾਰੀ ਰੱਖਣ ਦਾ ਫੈਸਲਾ ਕੀਤਾ ਅਤੇ ਜਹਾਜ਼ ਨੂੰ ਸੁਰੱਖਿਅਤ ਉਤਾਰ ਲਿਆ। AAIB ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਮੁਢਲੇ ਨਤੀਜੇ ਹਨ ਅਤੇ ਹਾਦਸੇ ਦੇ ਅਸਲ ਕਾਰਨਾਂ ਦੀ ਜਾਂਚ ਅਜੇ ਜਾਰੀ ਹੈ।