ਮੁੱਖ ਮੰਤਰੀ ਦੀ ਫੇਰੀ ਨੂੰ ਧਿਆਨ ’ਚ ਰੱਖਦਿਆਂ ਪ੍ਰਸ਼ਾਸਨ ਤੇ ਮੋਰਚੇ ਦੀ ਮੀਟਿੰਗ ਬੇਸਿੱਟਾ!

ਫਰੀਦਕੋਟ : ‘ਜਲ ਜੀਵਨ ਬਚਾਓ ਮੋਰਚਾ’ ਵੱਲੋਂ ਨਹਿਰਾਂ ਦੇ ਕੰਕਰੀਟੀਕਰਨ ਨੂੰ ਰੋਕਣ ਲਈ ਚੱਲਦੇ ਸੰਘਰਸ਼ ਵਿੱਚ ਅੱਜ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਨਹਿਰ ਮਹਿਕਮਾ ਅਤੇ ਵਿਧਾਇਕ ਗੁਰਦਿੱਤ ਸਿੰਘ ਸੇਖੋਂ ਹੋਣਾਂ ਨੂੰ ਨਾਲ ਲੈ ਕੇ ਇੱਕ ਮੀਟਿੰਗ ਡੀਸੀ ਦਫ਼ਤਰ ਫਰੀਦਕੋਟ ਵਿਖੇ ਰੱਖੀ ਗਈ। ਜਿਸ ਵਿੱਚ ਨਹਿਰ ਮਹਿਕਮੇ ਵੱਲੋਂ ਆਈਆਈਟੀ ਰੁੜਕੀ ਵੱਲੋਂ ਫੇਲ੍ਹ ਕਰਾਰ ਕੀਤਾ ਪ੍ਰਾਜੈਕਟ ਫ਼ਿਰ ਜਲ ਜੀਵਨ ਬਚਾਓ ਮੋਰਚਾ ਦੇ ਅੱਗੇ ਰੱਖਿਆ ਗਿਆ। ਇਹ ਉਹੀ ਪ੍ਰਾਜੈਕਟ ਹੈ ਜਿਸ ਨੂੰ ਐੱਸਈ ਨਹਿਰਾਂ ਪਿਛਲੀਆਂ ਮੀਟਿੰਗਾਂ ਵਿੱਚ ਫੇਲ੍ਹ ਹੋਇਆ ਪ੍ਰਾਜੈਕਟ ਕਹਿ ਕੇ ਪ੍ਰਚਾਰਦੇ ਆ ਰਹੇ ਹਨ। ਮੋਰਚਾ ਨੇ ਆਪਣੀ ਮੰਗ ਨੂੰ ਫਿਰ ਦੁਹਰਾਉਂਦੇ ਹੋਏ ਪ੍ਰਸ਼ਾਸਨ ਨੂੰ ਸਪੱਸ਼ਟ ਕੀਤਾ ਕਿ ਨਹਿਰਾਂ ਦੀ ਬ੍ਰਿਕ ਲਾਈਨਿੰਗ ਕਰ ਲਿਆ ਜਾਵੇ। ਤਲ ਤੇ ਦੀਵਾਰਾਂ ਨੂੰ ਇੱਟਾਂ ਦਾ ਬਣਾਇਆ ਜਾਵੇ ਅਤੇ ਵੱਧ ਤੋਂ ਵੱਧ ਦਰੱਖ਼ਤ ਬਚਾਏ ਜਾਣ। ਜੇਕਰ ਫ਼ਿਰ ਵੀ ਕੁੱਝ ਦਰੱਖਤ ਲਾਈਨਿੰਗ ਦੇ ਬਿਲਕੁਲ ਉੱਪਰ ਆਉਂਦੇ ਹੋਣਗੇ ਤਾਂ ਮੋਰਚਾ ਉਨ੍ਹਾਂ ਦਰੱਖਤਾਂ ਨੂੰ ਵੱਢਣ ਵਿੱਚ ਇਤਰਾਜ਼ ਨਹੀਂ ਕਰੇਗਾ। ਇਸ ਤੋਂ ਸਪੱਸ਼ਟ ਹੈ ਕਿ ਮੋਰਚਾ ਕਿਸੇ ਤਰ੍ਹਾਂ ਦੇ ਵਿਕਾਸ ਦਾ ਵਿਰੋਧੀ ਨਹੀਂ ਹੈ, ਸਗੋਂ ਆਪਣੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਦੇ ਹੱਕ ਪੀਣਯੋਗ ਪਾਣੀ ਬਚਾਉਣ ਲਈ ਫ਼ਿਕਰਮੰਦ ਹੈ। ਜਲ ਜੀਵਨ ਬਚਾਓ ਮੋਰਚਾ ਨੇ ਇਹ ਵੀ ਮੰਗ ਰੱਖੀ ਕਿ 26 ਜਨਵਰੀ ਨੂੰ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਫ਼ਰੀਦਕੋਟ ਆ ਰਹੇ ਹਨ, ਜਲ ਜੀਵਨ ਬਚਾਓ ਮੋਰਚਾ ਦੀ ਮੁੱਖ ਮੰਤਰੀ ਨਾਲ ਮੀਟਿੰਗ ਕਰਵਾਈ ਜਾਵੇ ਤਾਂ ਜੋ ਉਨ੍ਹਾ ਨੂੰ ਫ਼ਰੀਦਕੋਟ ਦੇ ਅਸਲ ਹਾਲਾਤਾਂ ਤੋਂ ਜਾਣੂ ਕਰਵਾਇਆ ਜਾ ਸਕੇ।