ਕ੍ਰਾਈਮ ਬ੍ਰਾਂਚ ਦੀ ਵੱਡੀ ਕਾਰਵਾਈ: ਮੁੰਡਕਾ ਤੋਂ 610 LPG ਸਿਲੰਡਰ ਜ਼ਬਤ

ਕ੍ਰਾਈਮ ਬ੍ਰਾਂਚ ਨੇ ਸੋਮਵਾਰ ਨੂੰ ਇੱਕ ਕਥਿਤ ਗੈਰ-ਕਾਨੂੰਨੀ ਐਲ.ਪੀ.ਜੀ. ਸਿਲੰਡਰ ਹੋਰਡਿੰਗ ਰੈਕੇਟ ਦਾ ਪਰਦਾਫਾਸ਼ ਕੀਤਾ ਅਤੇ ਸੁਰੱਖਿਆ ਨਿਯਮਾਂ ਅਤੇ ਸਰਕਾਰੀ ਨਿਯਮਾਂ ਦੀ ਉਲੰਘਣਾ ਕਰਕੇ ਸਟੋਰ ਕੀਤੇ 610 ਸਿਲੰਡਰ ਬਰਾਮਦ ਕੀਤੇ। ਇਹ ਕਾਰਵਾਈ ਐਲ.ਪੀ.ਜੀ. ਸਿਲੰਡਰਾਂ ਦੀ ਗੈਰ-ਕਾਨੂੰਨੀ ਸਟੋਰੇਜ ਬਾਰੇ ਵਿਸ਼ੇਸ਼ ਸੂਚਨਾ ਦੇ ਆਧਾਰ 'ਤੇ ਕੀਤੀ ਗਈ ਅਤੇ ਦਿੱਲੀ ਦੇ ਮੁੰਡਕਾ ਇਲਾਕੇ ਵਿੱਚ ਪੁਲੀਸ ਟੀਮ ਨੇ ਮੁੰਡਕਾ ਦੇ ਪਲਾਟ ਨੰਬਰ 9 ਸਥਿਤ ਗੁਰੂਜੀ ਇੰਡੇਨ ਗੈਸ ਸਰਵਿਸ 'ਤੇ ਛਾਪਾ ਮਾਰਿਆ। ਨਿਰੀਖਣ ਦੌਰਾਨ ਪੁਲੀਸ ਨੇ ਪਾਇਆ ਕਿ ਗੋਦਾਮ ਦੇ ਅੰਦਰ ਇੰਡੇਨ, ਭਾਰਤ ਗੈਸ ਅਤੇ ਐੱਚ.ਪੀ. ਗੈਸ ਸਮੇਤ ਕਈ ਤੇਲ ਮਾਰਕੀਟਿੰਗ ਕੰਪਨੀਆਂ ਦੇ ਵਪਾਰਕ ਐੱਲ ਪੀ ਜੀ ਸਿਲੰਡਰ ਇਕੱਠੇ ਸਟੋਰ ਕੀਤੇ ਗਏ ਸਨ। ਮੁੱਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਗੁਰੂਜੀ ਇੰਡੇਨ ਗੈਸ ਸਰਵਿਸ ਸਿਰਫ਼ ਇੰਡੇਨ ਕਮਰਸ਼ੀਅਲ ਐਲ.ਪੀ.ਜੀ. ਸਿਲੰਡਰਾਂ ਦੀ ਵੰਡ ਕਰਨ ਲਈ ਅਧਿਕਾਰਤ ਹੈ। ਹਾਲਾਂਕਿ, ਹੋਰ ਕੰਪਨੀਆਂ ਦੇ ਸਿਲੰਡਰ ਵੀ ਇਮਾਰਤ ਵਿੱਚ ਸਟੋਰ ਕੀਤੇ ਹੋਏ ਪਾਏ ਗਏ ਸਨ, ਜੋ ਕਿ ਐਲ.ਪੀ.ਜੀ. ਡਿਸਟ੍ਰੀਬਿਊਟਰਸ਼ਿਪ ਦੀਆਂ ਲਾਇਸੈਂਸ ਸ਼ਰਤਾਂ ਦੇ ਨਾਲ-ਨਾਲ ਐਲ.ਪੀ.ਜੀ. (ਸਪਲਾਈ ਅਤੇ ਡਿਸਟ੍ਰੀਬਿਊਸ਼ਨ ਦਾ ਨਿਯਮ) ਆਰਡਰ ਦੀ ਉਲੰਘਣਾ ਹੈ। ਤਲਾਸ਼ੀ ਮੁਹਿੰਮ ਦੌਰਾਨ ਪੁਲਿਸ ਨੇ ਭਰੇ ਅਤੇ ਖਾਲੀ ਕੁੱਲ 610 ਐੱਲ ਪੀ ਜੀ ਸਿਲੰਡਰ ਬਰਾਮਦ ਕੀਤੇ, ਜਿਨ੍ਹਾਂ ਵਿੱਚ 423 ਇੰਡੇਨ ਸਿਲੰਡਰ, 92 ਭਾਰਤ ਗੈਸ ਸਿਲੰਡਰ ਅਤੇ 95 ਐਚ.ਪੀ. ਗੈਸ ਸਿਲੰਡਰ ਸ਼ਾਮਲ ਹਨ। ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਬਰਾਮਦ ਕੀਤੇ ਗਏ ਸਿਲੰਡਰਾਂ ਵਿੱਚ 197 ਭਰੇ ਹੋਏ ਵਪਾਰਕ ਸਿਲੰਡਰ, 392 ਖਾਲੀ ਵਪਾਰਕ ਸਿਲੰਡਰ ਅਤੇ 21 ਛੋਟੇ ਆਕਾਰ ਦੇ ਖਾਲੀ ਸਿਲੰਡਰ ਸਨ। ਅੱਗੇ ਦੀ ਜਾਂਚ ਵਿੱਚ ਸਟਾਕ ਰਿਕਾਰਡ ਵਿੱਚ ਵੀ ਅੰਤਰ ਪਾਇਆ ਗਿਆ। ਇੰਡੀਅਨ ਆਇਲ ਕਾਰਪੋਰੇਸ਼ਨ (IOC) ਦੇ ਅਧਿਕਾਰੀਆਂ ਤੋਂ ਮਿਲੀ ਮੁੱਢਲੀ ਜਾਣਕਾਰੀ ਅਨੁਸਾਰ, 10 ਮਾਰਚ ਤੱਕ ਡਿਸਟ੍ਰੀਬਿਊਟਰ ਦਾ ਇੰਡੇਨ ਕਮਰਸ਼ੀਅਲ ਸਿਲੰਡਰਾਂ ਦਾ ਸਟਾਕ ਨਿਲ (ਜ਼ੀਰੋ) ਹੋਣ ਦੀ ਉਮੀਦ ਸੀ, ਹਾਲਾਂਕਿ ਇਮਾਰਤ ਵਿੱਚ 133 ਭਰੇ ਹੋਏ ਇੰਡੇਨ ਵਪਾਰਕ ਸਿਲੰਡਰ ਮਿਲੇ ਹਨ, ਜੋ ਸਟਾਕ ਪ੍ਰਬੰਧਨ ਵਿੱਚ ਬੇਨਿਯਮੀਆਂ ਅਤੇ ਅਣਅਧਿਕਾਰਤ ਸਟੋਰੇਜ ਵੱਲ ਇਸ਼ਾਰਾ ਕਰਦੇ ਹਨ। ਪੁਲੀਸ ਨੂੰ ਸ਼ੱਕ ਹੈ ਕਿ ਸਪਲਾਈ ਦੀ ਕਮੀ ਦੇ ਸਮੇਂ ਨਕਲੀ ਕਿੱਲਤ ਪੈਦਾ ਕਰਨ ਲਈ ਅਜਿਹੀ ਗੈਰ-ਕਾਨੂੰਨੀ ਜਮ੍ਹਾਂਖੋਰੀ ਕੀਤੀ ਜਾਂਦੀ ਹੈ, ਜਿਸ ਤੋਂ ਬਾਅਦ ਸਿਲੰਡਰ ਕਥਿਤ ਤੌਰ 'ਤੇ ਬਲੈਕ ਮਾਰਕੀਟਿੰਗ ਰਾਹੀਂ ਵਧੀਆਂ ਕੀਮਤਾਂ 'ਤੇ ਵੇਚੇ ਜਾਂਦੇ ਹਨ। ਬਰਾਮਦਗੀ ਤੋਂ ਬਾਅਦ, ਕ੍ਰਾਈਮ ਬ੍ਰਾਂਚ ਪੁਲੀਸ ਸਟੇਸ਼ਨ ਵਿੱਚ ਜ਼ਰੂਰੀ ਵਸਤਾਂ ਐਕਟ, 1955 ਦੀ ਧਾਰਾ 7 ਅਤੇ ਅਪਰਾਧਿਕ ਸਾਜ਼ਿਸ਼ ਲਈ ਭਾਰਤੀ ਨਿਆ ਸੰਹਿਤਾ ਦੀ ਧਾਰਾ 61(2) ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਛਾਪੇਮਾਰੀ ਦੌਰਾਨ ਗੋਦਾਮ ਦਾ ਮਾਲਕ ਮੌਕੇ 'ਤੇ ਮੌਜੂਦ ਨਹੀਂ ਸੀ ਅਤੇ ਫਿਲਹਾਲ ਫਰਾਰ ਹੈ।