ਕੈਨੇਡਾ ਦਾ ਸਭ ਤੋਂ ਵੱਡਾ ਰੱਖਿਆ ਸੌਦਾ: ਜਰਮਨੀ ਦੀ TKMS ਬਣਾਏਗੀ 12 ਨਵੀਆਂ ਪਣਡੁੱਬੀਆਂ

ਕੈਨੇਡਾ ਸਰਕਾਰ ਨੇ ਰਾਇਲ ਕੈਨੇਡੀਅਨ ਨੇਵੀ ਦੇ ਪੁਰਾਣੇ ਹੋ ਰਹੇ ਪਣਡੁੱਬੀ ਬੇੜੇ ਨੂੰ ਆਧੁਨਿਕ ਬਣਾਉਣ ਲਈ ਜਰਮਨੀ ਦੀ ਕੰਪਨੀ ਥਾਇਸਨਕਰੁਪ ਮਰੀਨ ਸਿਸਟਮਜ਼ (TKMS) ਨੂੰ ਤਰਜੀਹੀ ਸਪਲਾਇਰ ਵਜੋਂ ਚੁਣਿਆ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਸੋਮਵਾਰ ਨੂੰ ਹੈਲੀਫੈਕਸ ਸਥਿਤ ਕੈਨੇਡੀਅਨ ਹਥਿਆਰਬੰਦ ਬਲਾਂ ਦੇ ਅੱਡੇ ਦੇ ਦੌਰੇ ਦੌਰਾਨ ਇਸ ਮਹੱਤਵਪੂਰਨ ਫ਼ੈਸਲੇ ਦਾ ਐਲਾਨ ਕੀਤਾ। ਉਨ੍ਹਾਂ ਦੱਸਿਆ ਕਿ ਸਰਕਾਰ ਵੱਧ ਤੋਂ ਵੱਧ 12 ਨਵੀਆਂ ਪਣਡੁੱਬੀਆਂ ਦੀ ਖਰੀਦ ਲਈ ਹੁਣ TKMS ਨਾਲ ਰਸਮੀ ਗੱਲਬਾਤ ਸ਼ੁਰੂ ਕਰੇਗੀ। ਪ੍ਰਧਾਨ ਮੰਤਰੀ ਕਾਰਨੀ ਨੇ ਕਿਹਾ ਕਿ ਇਹ ਵਪਾਰਕ ਤੌਰ 'ਤੇ ਬਹੁਤ ਸੰਵੇਦਨਸ਼ੀਲ ਪ੍ਰਕਿਰਿਆ ਹੈ। ਇਸ ਲਈ ਗੱਲਬਾਤ ਦੀਆਂ ਸ਼ਰਤਾਂ ਅਤੇ ਕੁੱਲ ਲਾਗਤ ਬਾਰੇ ਜਾਣਕਾਰੀ ਅੰਤਿਮ ਸਮਝੌਤੇ ਤੋਂ ਪਹਿਲਾਂ ਜਨਤਕ ਨਹੀਂ ਕੀਤੀ ਜਾਵੇਗੀ। ਉਨ੍ਹਾਂ ਇਹ ਵੀ ਸਪੱਸ਼ਟ ਕੀਤਾ ਕਿ ਇਸ ਪ੍ਰਾਜੈਕਟ ਲਈ ਲੋੜੀਂਦੇ ਫੰਡ ਪਹਿਲਾਂ ਹੀ ਸੰਘੀ ਬਜਟ ਵਿੱਚ ਰੱਖੇ ਜਾ ਚੁੱਕੇ ਹਨ ਅਤੇ ਇਹ ਕੈਨੇਡਾ ਦੇ ਇਤਿਹਾਸ ਦਾ ਸਭ ਤੋਂ ਵੱਡਾ ਰੱਖਿਆ ਖਰੀਦ ਪ੍ਰਾਜੈਕਟ ਹੋਵੇਗਾ। ਸਮਝੌਤੇ ਦੀ ਇੱਕ ਮਹੱਤਵਪੂਰਨ ਸ਼ਰਤ ਇਹ ਰੱਖੀ ਗਈ ਹੈ ਕਿ ਕੈਨੇਡਾ ਵੱਲੋਂ ਕੀਤੇ ਜਾਣ ਵਾਲੇ ਨਿਵੇਸ਼ ਦੇ ਬਰਾਬਰ ਹੀ ਉਦਯੋਗਿਕ ਨਿਵੇਸ਼ ਜਰਮਨ ਕੰਪਨੀ ਕੈਨੇਡਾ ਵਿੱਚ ਕਰੇਗੀ। ਇਸ ਨਾਲ ਦੇਸ਼ ਦੇ ਰੱਖਿਆ ਉਦਯੋਗ, ਸਪਲਾਈ ਚੇਨ ਅਤੇ ਉੱਚ ਹੁਨਰ ਵਾਲੇ ਰੁਜ਼ਗਾਰ ਨੂੰ ਮਜ਼ਬੂਤੀ ਮਿਲਣ ਦੀ ਉਮੀਦ ਹੈ। ਸਰਕਾਰ ਦਾ ਟੀਚਾ ਸਾਲ 2027 ਦੇ ਅੰਤ ਤੱਕ ਇਸ ਸੌਦੇ ਨੂੰ ਅੰਤਿਮ ਰੂਪ ਦੇਣਾ ਹੈ। ਯੋਜਨਾ ਅਨੁਸਾਰ ਪਹਿਲੀਆਂ ਚਾਰ ਪਣਡੁੱਬੀਆਂ ਸਾਲ 2034 ਤੱਕ ਰਾਇਲ ਕੈਨੇਡੀਅਨ ਨੇਵੀ ਨੂੰ ਸੌਂਪੀਆਂ ਜਾਣਗੀਆਂ। ਇਸ ਤੋਂ ਬਾਅਦ ਮੌਜੂਦਾ ਵਿਕਟੋਰੀਆ-ਕਲਾਸ ਪਣਡੁੱਬੀਆਂ ਨੂੰ 2035 ਤੱਕ ਸੇਵਾ ਤੋਂ ਹਟਾਉਣ ਦੀ ਯੋਜਨਾ ਹੈ। ਇਸ ਵੇਲੇ ਕੈਨੇਡਾ ਕੋਲ ਵਿਕਟੋਰੀਆ ਸ਼੍ਰੇਣੀ ਦੀਆਂ ਚਾਰ ਪਣਡੁੱਬੀਆਂ ਹਨ, ਪਰ ਉਨ੍ਹਾਂ ਵਿੱਚੋਂ ਕੇਵਲ ਇੱਕ ਹੀ ਕਾਰਜਸ਼ੀਲ ਹੈ, ਜਦਕਿ ਬਾਕੀਆਂ ਦੇ ਪੁਰਜ਼ੇ ਕੱਢ ਕੇ ਹੋਰ ਜਹਾਜ਼ਾਂ ਦੀ ਵਰਤੋਂ ਲਈ ਲਗਾਏ ਜਾ ਰਹੇ ਹਨ। ਪ੍ਰਧਾਨ ਮੰਤਰੀ ਨੇ ਇਹ ਵੀ ਦੱਸਿਆ ਕਿ ਦੱਖਣੀ ਕੋਰੀਆ ਦੀ ਕੰਪਨੀ ਹੈਨਵਾ ਓਸ਼ਨ (Hanwha Ocean) ਨੂੰ ਰਾਖਵੇਂ ਸਪਲਾਇਰ ਵਜੋਂ ਚੁਣਿਆ ਗਿਆ ਹੈ। ਜੇਕਰ ਕਿਸੇ ਕਾਰਨ TKMS ਨਾਲ ਗੱਲਬਾਤ ਸਫ਼ਲ ਨਹੀਂ ਹੁੰਦੀ ਤਾਂ ਸਰਕਾਰ ਹੈਨਵਾ ਓਸ਼ਨ ਨਾਲ ਅਗਲੀ ਕਾਰਵਾਈ ਕਰੇਗੀ। ਉਨ੍ਹਾਂ ਕਿਹਾ ਕਿ ਦੋਵੇਂ ਕੰਪਨੀਆਂ ਮਜ਼ਬੂਤ ਦਾਅਵੇਦਾਰ ਸਨ ਅਤੇ ਚੋਣ ਕਰਨਾ ਆਸਾਨ ਨਹੀਂ ਸੀ। ਸਰਕਾਰ ਦੇ ਅਨੁਸਾਰ TKMS ਵੱਲੋਂ ਪੇਸ਼ ਕੀਤੀਆਂ ਗਈਆਂ 212CD ਸ਼੍ਰੇਣੀ ਦੀਆਂ ਪਣਡੁੱਬੀਆਂ ਆਧੁਨਿਕ ਤਕਨੀਕ ਨਾਲ ਲੈਸ ਹਨ। ਇਹ ਘੱਟ ਧੁਨੀ ਅਤੇ ਘੱਟ ਚੁੰਬਕੀ ਨਿਸ਼ਾਨ ਛੱਡਦੀਆਂ ਹਨ, ਜਿਸ ਨਾਲ ਦੁਸ਼ਮਣ ਦੇ ਸੋਨਾਰ ਸਿਸਟਮ ਤੋਂ ਬਚਣ ਦੀ ਸਮਰੱਥਾ ਵਧ ਜਾਂਦੀ ਹੈ। ਇਨ੍ਹਾਂ ਪਣਡੁੱਬੀਆਂ ਦੀ ਵਰਤੋਂ ਐਟਲਾਂਟਿਕ, ਪ੍ਰਸ਼ਾਂਤ ਅਤੇ ਆਰਕਟਿਕ ਖੇਤਰਾਂ ਵਿੱਚ ਗਸ਼ਤ, ਖੁਫੀਆ ਨਿਗਰਾਨੀ ਅਤੇ ਨਾਟੋ ਸਹਿਯੋਗੀ ਦੇਸ਼ਾਂ ਨਾਲ ਸਾਂਝੇ ਅਭਿਆਨਾਂ ਲਈ ਕੀਤੀ ਜਾਵੇਗੀ। ਜਰਮਨੀ ਅਤੇ ਨਾਰਵੇ ਲਈ ਬਣ ਰਹੀਆਂ ਪਣਡੁੱਬੀਆਂ ਦੇ ਉਤਪਾਦਨ ਕ੍ਰਮ ਵਿੱਚ ਤਬਦੀਲੀ ਕਰਨ ਦੀ ਕੰਪਨੀ ਦੀ ਪੇਸ਼ਕਸ਼ ਕਾਰਨ ਕੈਨੇਡਾ ਨੂੰ 2034 ਤੱਕ ਪਹਿਲੀ ਖੇਪ ਮਿਲਣ ਦੀ ਸੰਭਾਵਨਾ ਬਣੀ ਹੈ। TKMS ਯੂਰਪ ਵਿੱਚ ਰਵਾਇਤੀ ਪਣਡੁੱਬੀਆਂ ਦੀ ਪ੍ਰਮੁੱਖ ਨਿਰਮਾਤਾ ਕੰਪਨੀ ਹੈ। ਇੱਕੋ ਮਾਡਲ ਦੀ ਵਰਤੋਂ ਨਾਲ ਕੈਨੇਡਾ, ਜਰਮਨੀ ਅਤੇ ਨਾਰਵੇ ਵਿਚਾਲੇ ਸਿਖਲਾਈ, ਰੱਖ-ਰਖਾਅ ਅਤੇ ਫੌਜੀ ਸੰਚਾਲਨ ਵਿੱਚ ਵੀ ਬਿਹਤਰ ਤਾਲਮੇਲ ਬਣਿਆ ਰਹੇਗਾ।