ਬਲੂ ਵਾਟਰ ਬ੍ਰਿਜ 'ਤੇ ਸੀਬੀਐਸਏ ਦੀ ਵੱਡੀ ਕਾਰਵਾਈ: 36 ਲੱਖ ਡਾਲਰ ਤੋਂ ਵੱਧ ਦਾ ਗੈਰ-ਕਾਨੂੰਨੀ ਤੰਬਾਕੂ ਤੇ ਨਿਕੋਟੀਨ ਜ਼ਬਤ

ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ (CBSA) ਨੇ ਓਨਟਾਰੀਓ ਦੇ ਪੁਆਇੰਟ ਐਡਵਰਡ ਸਥਿਤ ਬਲੂ ਵਾਟਰ ਬ੍ਰਿਜ 'ਤੇ ਸਰਹੱਦ ਪਾਰ ਤਸਕਰੀ ਵਿਰੁੱਧ ਵੱਡੀ ਕਾਰਵਾਈ ਕਰਦਿਆਂ 36 ਲੱਖ ਡਾਲਰ (3.6 ਮਿਲੀਅਨ ਡਾਲਰ) ਤੋਂ ਵੱਧ ਦੀ ਕੀਮਤ ਦੇ ਗੈਰ-ਕਾਨੂੰਨੀ ਤੰਬਾਕੂ ਅਤੇ ਨਿਕੋਟੀਨ ਉਤਪਾਦ ਬਰਾਮਦ ਕੀਤੇ ਹਨ। ਇਹ ਕਾਰਵਾਈ ਅਮਰੀਕਾ ਵੱਲੋਂ ਕੈਨੇਡਾ ਵਿੱਚ ਦਾਖਲ ਹੋ ਰਹੇ ਦੋ ਵੱਖ-ਵੱਖ ਵਪਾਰਕ ਵਾਹਨਾਂ ਨੂੰ ਰੋਕ ਕੇ ਕੀਤੀ ਗਈ। ਸੀਬੀਐਸਏ ਵੱਲੋਂ ਜਾਰੀ ਅਧਿਕਾਰਤ ਜਾਣਕਾਰੀ ਅਨੁਸਾਰ, ਪਹਿਲਾ ਮਾਮਲਾ 9 ਸਤੰਬਰ ਦਾ ਹੈ, ਜਦੋਂ ਸਰਹੱਦੀ ਅਧਿਕਾਰੀਆਂ ਨੇ ਇੱਕ ਕਮਰਸ਼ੀਅਲ ਡਰਾਈਵਰ ਦੇ ਵਾਹਨ ਦੀ ਚੈਕਿੰਗ ਦੌਰਾਨ 16,147 ਕਿਲੋਗ੍ਰਾਮ ਬਲਕ ਤੰਬਾਕੂ ਜ਼ਬਤ ਕੀਤਾ। ਬਜ਼ਾਰ ਵਿੱਚ ਇਸ ਵਿਸ਼ਾਲ ਖੇਪ ਦੀ ਅੰਦਾਜ਼ਨ ਕੀਮਤ ਲਗਭਗ 29 ਲੱਖ ਡਾਲਰ ਦੱਸੀ ਗਈ ਹੈ। ਇਸ ਘਟਨਾ ਦੇ ਅਗਲੇ ਹੀ ਦਿਨ, 10 ਸਤੰਬਰ ਨੂੰ ਅਧਿਕਾਰੀਆਂ ਨੇ ਇੱਕ ਹੋਰ ਵਪਾਰਕ ਡਰਾਈਵਰ ਦੇ ਵਾਹਨ ਦੀ ਤਲਾਸ਼ੀ ਲਈ। ਇਸ ਦੌਰਾਨ ਵਾਹਨ 'ਚੋਂ 4,992 ਕਿਲੋਗ੍ਰਾਮ ਤੰਬਾਕੂ ਉਤਪਾਦ ਅਤੇ 500 ਨਿਕੋਟੀਨ ਵੇਪ ਬਰਾਮਦ ਕੀਤੇ ਗਏ, ਜਿਨ੍ਹਾਂ ਦੀ ਕੁੱਲ ਕੀਮਤ 6.2 ਲੱਖ ਡਾਲਰ ਤੋਂ ਵੱਧ ਆਂਕੀ ਗਈ ਹੈ। ਏਜੰਸੀ ਨੇ ਪੁਸ਼ਟੀ ਕੀਤੀ ਹੈ ਕਿ ਦੋਵਾਂ ਮਾਮਲਿਆਂ ਵਿੱਚ ਫੜੇ ਗਏ ਡਰਾਈਵਰ ਕੈਨੇਡਾ ਦੇ ਹੀ ਵਸਨੀਕ ਹਨ। ਫਿਲਹਾਲ ਸੀਬੀਐਸਏ ਦੇ ਅਧਿਕਾਰੀਆਂ ਵੱਲੋਂ ਦੋਵਾਂ ਘਟਨਾਵਾਂ ਦੀ ਡੂੰਘਾਈ ਨਾਲ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਇਸ ਮਾਮਲੇ ਨਾਲ ਜੁੜੀਆਂ ਹੋਰ ਅਹਿਮ ਜਾਣਕਾਰੀਆਂ ਜਲਦ ਸਾਹਮਣੇ ਆਉਣ ਦੀ ਉਮੀਦ ਹੈ।