ਨੇਪਾਲ ’ਚ ਹੜ੍ਹ ਦੀ ਤਬਾਹੀ ਵਿਚਕਾਰ ਪਾਣੀ ਤੇ ਮਲਬੇ ਨਾਲ ਘਿਰਿਆ ਘਰ, ਬਾਲਕੋਨੀ ’ਚ ਖੜ੍ਹੇ 3 ਜਣਿਆਂ ਦੀ ਬਚੀ ਜਾਨ

ਨੇਪਾਲ ਵਿੱਚ ਹੜ੍ਹ ਦੀ ਤਬਾਹੀ ਦੇ ਦਰਮਿਆਨ ਇੱਕ ਅਜਿਹਾ ਘਰ ਤੇਜ਼ ਪਾਣੀ ਦੇ ਵਹਾਅ ਦੇ ਬਾਵਜੂਦ ਸੁਰੱਖਿਅਤ ਖੜ੍ਹਾ ਰਿਹਾ, ਜਿਸ ਦੇ ਆਲੇ-ਦੁਆਲੇ ਦਾ ਪੂਰਾ ਇਲਾਕਾ ਪਾਣੀ ਅਤੇ ਮਲਬੇ ਵਿੱਚ ਡੁੱਬ ਗਿਆ। ਕਈ ਇਮਾਰਤਾਂ ਹੜ੍ਹ ਦੇ ਵਹਾਅ ਵਿੱਚ ਮਲਬੇ ਵਿੱਚ ਤਬਦੀਲ ਹੋ ਕੇ ਵਹਿ ਗਈਆਂ, ਪਰ ਇਸ ਘਰ ਦੇ ਬਚੇ ਰਹਿਣ ਕਾਰਨ ਇਸ ਦੀ ਬਾਲਕੋਨੀ ਵਿੱਚ ਮੌਜੂਦ ਤਿੰਨ ਲੋਕਾਂ ਦੀ ਜਾਨ ਬਚ ਗਈ। ਇਸ ਘਟਨਾ ਨਾਲ ਸਬੰਧਤ ਇੱਕ ਵੀਡੀਓ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀ ਹੈ। ਹਾਲਾਂਕਿ, ਅਜੇ ਤੱਕ ਇਹ ਪੁਸ਼ਟੀ ਨਹੀਂ ਹੋ ਸਕੀ ਕਿ ਨੇਪਾਲ ਦੇ ਕਿਸ ਇਲਾਕੇ ਵਿੱਚ ਇਹ ਵੀਡੀਓ ਬਣਾਈ ਗਈ ਹੈ। ਹੜ੍ਹਾਂ ’ਚ 633 ਮੌਤਾਂ ਨੇਪਾਲ ਪੁਲਿਸ ਮੁਤਾਬਕ ਹੜ੍ਹਾਂ ਕਾਰਨ ਹੁਣ ਤੱਕ 633 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ। ਇਸ ਤੋਂ ਇਲਾਵਾ ਲਗਭਗ 2,500 ਲੋਕ ਲਾਪਤਾ ਹਨ ਜਾਂ ਉਨ੍ਹਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ ਹੈ। ਲਾਪਤਾ ਜਾਂ ਸੰਪਰਕ ਤੋਂ ਬਾਹਰ ਲੋਕਾਂ ਵਿੱਚ 320 ਭਾਰਤੀ ਨਾਗਰਿਕ ਵੀ ਸ਼ਾਮਲ ਹਨ। ਚੀਨ ਵਾਲੇ ਪਾਸੇ ਫਸੇ ਭਾਰਤੀ ਸੁਰੱਖਿਅਤ ਵਿਦੇਸ਼ ਮੰਤਰਾਲੇ ਅਨੁਸਾਰ ਲਗਭਗ 400 ਭਾਰਤੀ ਨਾਗਰਿਕ ਚੀਨ ਵਾਲੇ ਪਾਸੇ ਫਸੇ ਹੋਏ ਹਨ। ਮੰਤਰਾਲੇ ਮੁਤਾਬਕ ਇਹ ਸਾਰੇ ਸੁਰੱਖਿਅਤ ਹਨ। ਭਾਰਤ ਸਰਕਾਰ ਉਨ੍ਹਾਂ ਨੂੰ ਵਾਪਸ ਲਿਆਉਣ ਲਈ ਚੀਨੀ ਅਧਿਕਾਰੀਆਂ ਦੇ ਸੰਪਰਕ ਵਿੱਚ ਹੈ। ਇਸ ਦੌਰਾਨ 153 ਭਾਰਤੀ ਨਾਗਰਿਕ ਚੀਨ ਤੋਂ ਸੁਰੱਖਿਅਤ ਤਰੀਕੇ ਨਾਲ ਨੇਪਾਲ ਪਹੁੰਚ ਚੁੱਕੇ ਹਨ।