ਭਾਰਤ ਦਾ ਵੱਡਾ ਕਦਮ: ਲਦਾਖ ਦੀਆਂ 28 ਥਾਵਾਂ ਨੂੰ 'ਸਰਵੇਅ ਆਫ਼ ਇੰਡੀਆ' ਦੇ ਸਰਕਾਰੀ ਨਕਸ਼ੇ ਵਿੱਚ ਦਿੱਤੇ ਗਏ ਨਵੇਂ ਨਾਮ

ਭਾਰਤ ਸਰਕਾਰ ਨੇ ਲਦਾਖ ਵਿੱਚ ਆਪਣੀ ਜ਼ਮੀਨ ਅਤੇ ਖੇਤਰੀ ਅਧਿਕਾਰ ਨੂੰ ਹੋਰ ਮਜ਼ਬੂਤ ਕਰਨ ਲਈ ਇੱਕ ਅਹਿਮ ਅਤੇ ਵੱਡਾ ਫੈਸਲਾ ਲਿਆ ਹੈ। ਸਰਕਾਰ ਵੱਲੋਂ ਲਦਾਖ ਦੀਆਂ 28 ਮਹੱਤਵਪੂਰਨ ਥਾਵਾਂ ਦੇ ਨਾਮ ‘ਸਰਵੇਅ ਆਫ਼ ਇੰਡੀਆ’ ਦੇ ਸਰਕਾਰੀ ਨਕਸ਼ੇ ਵਿੱਚ ਦਰਜ ਕਰ ਦਿੱਤੇ ਗਏ ਹਨ। ਮਾਹਿਰਾਂ ਅਨੁਸਾਰ ਇਹ ਕਦਮ ਚੀਨ ਨੂੰ ਮੂੰਹਤੋੜ ਜਵਾਬ ਦੇਣ ਲਈ ਚੁੱਕਿਆ ਗਿਆ ਹੈ, ਕਿਉਂਕਿ ਚੀਨ ਅਕਸਰ ਸਰਹੱਦੀ ਇਲਾਕਿਆਂ ਦੇ ਨਾਮ ਬਦਲ ਕੇ ਉਨ੍ਹਾਂ ਉੱਤੇ ਆਪਣੇ ਨਾਜਾਇਜ਼ ਦਾਅਵੇ ਪੇਸ਼ ਕਰਦਾ ਰਹਿੰਦਾ ਹੈ। ਹੁਣ ਭਾਰਤ ਦੇ ਸਰਕਾਰੀ ਰਿਕਾਰਡ ਅਤੇ ਨਕਸ਼ੇ ਵਿੱਚ ਇਹ ਨਾਮ ਪੱਕੇ ਤੌਰ ’ਤੇ ਦਰਜ ਹੋ ਚੁੱਕੇ ਹਨ। ਸਰਕਾਰ ਵੱਲੋਂ ਜਾਰੀ ਕੀਤੇ ਗਏ ਇਨ੍ਹਾਂ 28 ਨਾਵਾਂ ਵਿੱਚ ਪਹਾੜੀ ਚੋਟੀਆਂ, ਗਲੇਸ਼ੀਅਰ, ਦਰਿਆ, ਝੀਲਾਂ ਅਤੇ ਨਦੀਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਇਨ੍ਹਾਂ ਵਿੱਚੋਂ ਕੁਝ ਪ੍ਰਮੁੱਖ ਨਾਮ ਅਤਿਸ਼ਾ ਗਿਰੀ, ਕਨਿਸ਼ਕ ਪੀਕ, ਜ਼ੋਰਾਵਰ ਪੀਕ, ਗੁਰੂ ਰਿਨਪੋਚੇ ਝੀਲ ਅਤੇ ਯਾਂਗਪਾ ਨਦੀ ਸ਼ਾਮਲ ਹਨ। ਕੇਂਦਰੀ ਪ੍ਰਸ਼ਾਸਨ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਨਾਮ ਲਦਾਖ ਪ੍ਰਸ਼ਾਸਨ ਨਾਲ ਡੂੰਘੀ ਸਲਾਹ-ਮਸ਼ਵਰੇ ਤੋਂ ਬਾਅਦ ਰੱਖੇ ਗਏ ਹਨ। ਇਸ ਕਦਮ ਨਾਲ ਆਮ ਲੋਕਾਂ ਅਤੇ ਖੋਜਕਾਰਾਂ ਨੂੰ ਇਨ੍ਹਾਂ ਇਤਿਹਾਸਕ ਅਤੇ ਭੂਗੋਲਿਕ ਥਾਵਾਂ ਬਾਰੇ ਸਹੀ ਤੇ ਪ੍ਰਮਾਣਿਕ ਜਾਣਕਾਰੀ ਮਿਲ ਸਕੇਗੀ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਚੀਨ ਵੱਲੋਂ ਅਰੁਣਾਚਲ ਪ੍ਰਦੇਸ਼ ਦੀਆਂ ਕਈ ਥਾਵਾਂ ਦੇ ਨਾਮ ਬਦਲਣ ਦੀਆਂ ਕੋਸ਼ਿਸ਼ ਕੀਤੀਆਂ ਗਈਆਂ ਸਨ। ਉਸ ਸਮੇਂ ਵੀ ਭਾਰਤ ਨੇ ਸਖ਼ਤ ਪ੍ਰਤੀਕਿਰਿਆ ਦਿੰਦਿਆਂ ਕਿਹਾ ਸੀ ਕਿ ਮਨਘੜਤ ਅਤੇ ਝੂਠੇ ਨਾਮ ਰੱਖਣ ਨਾਲ ਜ਼ਮੀਨ ਦੀ ਮਲਕੀਅਤ ਨਹੀਂ ਬਦਲ ਜਾਂਦੀ। ਹੁਣ ਭਾਰਤ ਨੇ ਖ਼ੁਦ ਆਪਣੇ ਸਰਕਾਰੀ ਨਕਸ਼ੇ ਵਿੱਚ ਇਨ੍ਹਾਂ ਸਥਾਨਾਂ ਦੇ ਨਾਮ ਦਰਜ ਕਰਕੇ ਆਪਣਾ ਪੱਖ ਹੋਰ ਮਜ਼ਬੂਤ ਕਰ ਲਿਆ ਹੈ। ਇਹ ਨਾਮ ਦੇਸ਼ ਦੇ ਅਮੀਰ ਇਤਿਹਾਸ ਅਤੇ ਸੱਭਿਆਚਾਰ ਨਾਲ ਵੀ ਡੂੰਘੀ ਤਰ੍ਹਾਂ ਜੁੜੇ ਹੋਏ ਹਨ; ਜਿਵੇਂ ਕਿ ‘ਜ਼ੋਰਾਵਰ ਪੀਕ’ ਮਹਾਨ ਜਨਰਲ ਜ਼ੋਰਾਵਰ ਸਿੰਘ ਦੇ ਨਾਮ ਉੱਤੇ ਅਤੇ ‘ਗੁਰੂ ਰਿਨਪੋਚੇ’ ਬੋਧੀ ਧਰਮ ਦੇ ਆਦਰਸ਼ ਗੁਰੂ ਦੇ ਨਾਮ ਉੱਤੇ ਰੱਖਿਆ ਗਿਆ ਹੈ। ਇਹ ਅੱਪਡੇਟ ਕੀਤਾ ਗਿਆ ਨਵਾਂ ਨਕਸ਼ਾ ਹੁਣ ਸਰਵੇਅ ਆਫ਼ ਇੰਡੀਆ ਦੀ ਅਧਿਕਾਰਤ ਵੈੱਬਸਾਈਟ ਉੱਤੇ ਉਪਲਬਧ ਹੈ।