ਸ਼ੁਰੂਆਤੀ ਝਟਕਿਆਂ ਤੋਂ ਬਾਅਦ ਸੰਭਲਿਆ ਨਿਊਜ਼ੀਲੈਂਡ: ਗੇਂਦ ਪੁਰਾਣੀ ਹੋਣ ਮਗਰੋਂ ਭਾਰਤੀ ਤੇਜ਼ ਗੇਂਦਬਾਜ਼ਾਂ ਦੀ ਕਮੀ ਆਈ ਸਾਹਮਣੇ
ਭਾਰਤ ਅਤੇ ਨਿਊਜ਼ੀਲੈਂਡ ਵਿਚਾਲੇ ਖੇਡੇ ਜਾ ਰਹੇ ਪਹਿਲੇ ਟੈਸਟ ਮੈਚ ਦੇ ਸ਼ੁਰੂਆਤੀ ਦਿਨ ਵੀਰਵਾਰ ਨੂੰ ਬੇਸਿਨ ਰਿਜ਼ਰਵ ਮੈਦਾਨ 'ਤੇ ਭਾਰਤੀ ਕਪਤਾਨ ਸ਼ੁਭਮਨ ਗਿੱਲ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫ਼ੈਸਲਾ ਕੀਤਾ। ਪਹਿਲਾਂ ਬੱਲੇਬਾਜ਼ੀ ਕਰਨ ਉੱਤਰੀ ਮੇਜ਼ਬਾਨ ਨਿਊਜ਼ੀਲੈਂਡ ਦੀ ਟੀਮ ਨੇ ਖ਼ਰਾਬ ਸ਼ੁਰੂਆਤ ਤੋਂ ਉਭਰਦਿਆਂ ਹੈਨਰੀ ਨਿਕੋਲਸ ਦੇ ਜੁਝਾਰੂ ਸੈਂਕੜੇ ਦੀ ਬਦੌਲਤ ਪਹਿਲੇ ਦਿਨ ਦੀ ਖੇਡ ਖ਼ਤਮ ਹੋਣ ਤੱਕ ਪੰਜ ਵਿਕਟਾਂ ਦੇ ਨੁਕਸਾਨ 'ਤੇ 243 ਦੌੜਾਂ ਬਣਾ ਕੇ ਆਪਣੀ ਸਥਿਤੀ ਮਜ਼ਬੂਤ ਕਰ ਲਈ। ਨਿਊਜ਼ੀਲੈਂਡ ਦਾ ਸਕੋਰ ਇੱਕ ਸਮੇਂ ਪੰਜ ਵਿਕਟਾਂ 'ਤੇ 70 ਦੌੜਾਂ ਸੀ, ਪਰ ਇਸ ਤੋਂ ਬਾਅਦ ਨਿਕੋਲਸ (ਨਾਬਾਦ 113 ਦੌੜਾਂ, 221 ਗੇਂਦਾਂ) ਨੇ ਸੈਂਕੜਾ ਜੜਨ ਦੇ ਨਾਲ-ਨਾਲ ਗਲੇਨ ਫਿਲਿਪਸ (ਨਾਬਾਦ 94 ਦੌੜਾਂ, 181 ਗੇਂਦਾਂ) ਨਾਲ ਛੇਵੇਂ ਵਿਕਟ ਲਈ 173 ਦੌੜਾਂ ਦੀ ਅਟੁੱਟ ਸਾਂਝੇਦਾਰੀ ਕਰਕੇ ਟੀਮ ਨੂੰ ਸੰਭਾਲ ਲਿਆ। ਨਿਕੋਲਸ ਨੇ 188 ਗੇਂਦਾਂ ਵਿੱਚ ਆਪਣਾ 12ਵਾਂ ਟੈਸਟ ਸੈਂਕੜਾ ਪੂਰਾ ਕੀਤਾ। ਕੇਨ ਵਿਲੀਅਮਸਨ ਦੇ ਅਚਾਨਕ ਸੰਨਿਆਸ ਤੋਂ ਬਾਅਦ ਮੁੱਖ ਕੋਚ ਰੌਬ ਵਾਲਟਰ ਨੇ 35 ਸਾਲਾ ਨਿਕੋਲਸ ਨੂੰ ਤੀਜੇ ਨੰਬਰ ਦੀ ਜ਼ਿੰਮੇਵਾਰੀ ਸੌਂਪੀ ਸੀ, ਜਿਸ 'ਤੇ ਉਹ ਪੂਰੀ ਤਰ੍ਹਾਂ ਖ਼ਰੇ ਉਤਰੇ। ਇਸ ਤੋਂ ਪਹਿਲਾਂ, ਨਵੀਂ ਕੂਕਾਬੂਰਾ ਗੇਂਦ ਦੀ ਚਮਕ ਬਰਕਰਾਰ ਰਹਿਣ ਤੱਕ ਭਾਰਤ ਨੇ ਸ਼ਾਨਦਾਰ ਗੇਂਦਬਾਜ਼ੀ ਕਰਦਿਆਂ ਸਵੇਰ ਦੇ ਸੈਸ਼ਨ ਵਿੱਚ ਕਪਤਾਨ ਟੌਮ ਲੈਥਮ (00), ਡੇਵੋਨ ਕੌਨਵੇ (04), ਰਚਿਨ ਰਵਿੰਦਰਾ (15) ਅਤੇ ਡੈਰਿਲ ਮਿਚੇਲ (01) ਦੀਆਂ ਵਿਕਟਾਂ ਝਟਕਾਈਆਂ। ਮਿਚੇਲ ਦਾ ਸ਼ਾਨਦਾਰ ਕੈਚ ਸ਼ਾਰਟ ਲੈੱਗ 'ਤੇ ਯਸ਼ਸਵੀ ਜੈਸਵਾਲ ਨੇ ਲਪਕਿਆ। ਜਦੋਂ ਜਸਪ੍ਰੀਤ ਬੁਮਰਾਹ (52 ਦੌੜਾਂ ਦੇ ਕੇ ਤਿੰਨ ਵਿਕਟਾਂ) ਨੇ ਟੌਮ ਬਲੰਡਲ (05) ਨੂੰ ਸਲਿੱਪ ਵਿੱਚ ਗਿੱਲ ਹੱਥੋਂ ਕੈਚ ਕਰਵਾਇਆ ਤਾਂ ਭਾਰਤ ਕੋਲ ਮੇਜ਼ਬਾਨ ਟੀਮ ਨੂੰ ਘੱਟ ਸਕੋਰ 'ਤੇ ਸਮੇਟਣ ਦਾ ਸੁਨਹਿਰੀ ਮੌਕਾ ਸੀ। ਹਾਲਾਂਕਿ, 30 ਓਵਰਾਂ ਬਾਅਦ ਗੇਂਦ ਪੁਰਾਣੀ ਹੁੰਦਿਆਂ ਹੀ ਮੁਕਾਬਲੇ ਦਾ ਰੁਖ਼ ਬਦਲ ਗਿਆ ਅਤੇ ਬੁਮਰਾਹ ਤੇ ਬਾਕੀ ਤਿੰਨ ਤੇਜ਼ ਗੇਂਦਬਾਜ਼ਾਂ ਦੇ ਪੱਧਰ ਦਾ ਅੰਤਰ ਸਾਫ਼ ਨਜ਼ਰ ਆਇਆ। ਲੰਚ ਤੋਂ ਬਾਅਦ ਫਿਲਿਪਸ ਨੇ ਹਮਲਾਵਰ ਬੱਲੇਬਾਜ਼ੀ ਅਪਣਾਈ, ਜਿਸ ਨਾਲ ਪਾਰੀ ਨੂੰ ਰਫ਼ਤਾਰ ਮਿਲੀ। ਪੁਰਾਣੀ ਗੇਂਦ ਨਾਲ ਸਿਰਫ਼ ਬੁਮਰਾਹ ਹੀ ਖ਼ਤਰਨਾਕ ਦਿਖਾਈ ਦਿੱਤੇ। ਮੁਹੰਮਦ ਸਿਰਾਜ ਦੀ ਥਾਂ ਟੀਮ ਵਿੱਚ ਸ਼ਾਮਲ ਕੀਤੇ ਗਏ ਅੰਸ਼ੁਲ ਕੰਬੋਜ (57 ਦੌੜਾਂ 'ਤੇ ਇੱਕ ਵਿਕਟ) ਆਪਣੀ ਘੱਟ ਰਫ਼ਤਾਰ (128-130 ਕਿਲੋਮੀਟਰ ਪ੍ਰਤੀ ਘੰਟਾ) ਕਾਰਨ ਬਹੁਤਾ ਪ੍ਰਭਾਵ ਨਹੀਂ ਛੱਡ ਸਕੇ। ਪ੍ਰਸਿੱਧ ਕ੍ਰਿਸ਼ਨਾ (ਬਿਨਾਂ ਵਿਕਟ 58 ਦੌੜਾਂ) ਨੇ ਕਾਫ਼ੀ ਚੌਕੇ ਦਿੱਤੇ, ਜਦਕਿ ਆਕਾਸ਼ ਦੀਪ ਨੇ 33 ਦੌੜਾਂ ਦੇ ਕੇ ਇੱਕ ਵਿਕਟ ਹਾਸਲ ਕੀਤੀ। ਕ੍ਰਿਸ਼ਨਾ ਦੀ ਗੇਂਦ 'ਤੇ ਰਿਸ਼ਭ ਪੰਤ ਅਤੇ ਦੇਵਦੱਤ ਪਡੀਕਲ ਵਿਚਾਲੇ ਤਾਲਮੇਲ ਦੀ ਘਾਟ ਕਾਰਨ ਨਿਕੋਲਸ ਨੂੰ ਜੀਵਨਦਾਨ ਵੀ ਮਿਲਿਆ।