ਕੈਨੇਡਾ ਦੇ ਗ੍ਰੇਟਰ ਟੋਰਾਂਟੋ ਏਰੀਆ (GTA) ਵਿੱਚ ਸੜਕਾਂ 'ਤੇ ਗੈਰ-ਕਾਨੂੰਨੀ ਰੇਸਿੰਗ ਅਤੇ ਖ਼ਤਰਨਾਕ ਸਟੰਟ ਡਰਾਈਵਿੰਗ ਕਰਨ ਵਾਲਿਆਂ ਖ਼ਿਲਾਫ਼ ਪੁਲਿਸ ਨੇ ਸਖ਼ਤ ਰੁੱਖ ਅਖ਼ਤਿਆਰ ਕਰ ਲਿਆ ਹੈ। ਪੀਲ ਖੇਤਰੀ ਪੁਲਿਸ ਦੁਆਰਾ ਚਲਾਏ ਜਾ ਰਹੇ ਵਿਸ਼ੇਸ਼ ‘ਪ੍ਰੋਜੈਕਟ ਈਰੇਜ਼’ (Project ERASE) ਤਹਿਤ ਟੋਰਾਂਟੋ ਦੇ 25 ਸਾਲਾ ਨੌਜਵਾਨ ਈਥਨ ਟੋਲੈਂਡਰ (Ethan Tolander) ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਦੋਸ਼ੀ 'ਤੇ ਦੋ ਦਰਜਨ ਦੇ ਕਰੀਬ (24) ਵੱਖ-ਵੱਖ ਅਪਰਾਧਿਕ ਮਾਮਲੇ ਦਰਜ ਕੀਤੇ ਗਏ ਹਨ। ਪੁਲਿਸ ਦੇ ‘ਸੇਫ਼ਰ ਰੋਡਜ਼’ (Safer Roads) ਦਸਤੇ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ, ਇਸ ਸਾਲ ਦੀ ਸ਼ੁਰੂਆਤ 'ਚ ਇਲਾਕੇ ਵਿੱਚ ਹੋ ਰਹੀਆਂ ਸੰਗਠਿਤ ਗੈਰ-ਕਾਨੂੰਨੀ ਕਾਰ ਰੇਸਾਂ ਦੀ ਜਾਂਚ ਦੌਰਾਨ ਇੱਕ ਨੀਲੇ ਰੰਗ ਦੀ ਬੀਐਮਡਬਲਯੂ 340ਆਈ (BMW 340i) ਸੈਡਾਨ ਕਾਰ ਦੀ ਪਛਾਣ ਕੀਤੀ ਗਈ ਸੀ। ਪੁਲਿਸ ਨੂੰ ਸ਼ੱਕ ਸੀ ਕਿ ਇਹ ਵਾਹਨ ਕਈ ਗੈਰ-ਕਾਨੂੰਨੀ ਰੇਸਾਂ ਅਤੇ ਸਟੰਟ ਬਾਜ਼ੀਆਂ ਵਿੱਚ ਲਗਾਤਾਰ ਵਰਤਿਆ ਜਾ ਰਿਹਾ ਸੀ। ਇਸੇ ਜਾਂਚ ਦੇ ਆਧਾਰ 'ਤੇ ਵੀਰਵਾਰ ਨੂੰ ਟੋਰਾਂਟੋ ਵਿੱਚ ਸਰਚ ਵਾਰੰਟ ਲਾਗੂ ਕਰਦਿਆਂ ਪੁਲਿਸ ਨੇ ਛਾਪੇਮਾਰੀ ਕੀਤੀ ਅਤੇ ਕਾਰ ਸਮੇਤ ਹੋਰ ਅਹਿਮ ਸਬੂਤ ਆਪਣੇ ਕਬਜ਼ੇ ਵਿੱਚ ਲਏ। ਗ੍ਰਿਫ਼ਤਾਰ ਕੀਤੇ ਗਏ ਈਥਨ ਟੋਲੈਂਡਰ 'ਤੇ ਪੁਲਿਸ ਵੱਲੋਂ ਕਈ ਗੰਭੀਰ ਦੋਸ਼ ਆਇਦ ਕੀਤੇ ਗਏ ਹਨ। ਅਧਿਕਾਰੀਆਂ ਅਨੁਸਾਰ ਉਸ ਵਿਰੁੱਧ ਭੇਸ ਬਦਲਣ ਦੀ ਨੀਅਤ, ਪੁਲਿਸ ਅਧਿਕਾਰੀ ਤੋਂ ਭੱਜਣ, ਰਿਹਾਈ ਦੇ ਹੁਕਮਾਂ ਦੀ ਉਲੰਘਣਾ ਕਰਨ ਦੇ ਤਿੰਨ ਮਾਮਲੇ, ਅਪਰਾਧ ਰਾਹੀਂ ਹਾਸਿਲ ਕੀਤੀ ਜਾਇਦਾਦ ਰੱਖਣ ਦੇ ਪੰਜ ਮਾਮਲੇ ਅਤੇ ਖ਼ਤਰਨਾਕ ਢੰਗ ਨਾਲ ਵਾਹਨ ਚਲਾਉਣ ਤੇ ਕਾਰ ਰੇਸਿੰਗ ਦੇ ਸੱਤ-ਸੱਤ ਮਾਮਲਿਆਂ ਸਮੇਤ ਕੁੱਲ ਦੋ ਦਰਜਨ ਦੇ ਕਰੀਬ ਦੋਸ਼ ਸ਼ਾਮਲ ਹਨ। ਜ਼ਿਕਰਯੋਗ ਹੈ ਕਿ ਜੀਟੀਏ ਦੀਆਂ ਸੜਕਾਂ 'ਤੇ ਗੈਰ-ਕਾਨੂੰਨੀ ਰੇਸਿੰਗ, ਸਟੰਟ ਡਰਾਈਵਿੰਗ ਅਤੇ ਗੈਰ-ਕਾਨੂੰਨੀ ਕਾਰਾਂ ਦੇ ਇਕੱਠਾਂ 'ਤੇ ਠੱਲ੍ਹ ਪਾਉਣ ਲਈ ਮਈ 2024 ਵਿੱਚ ‘ਪ੍ਰੋਜੈਕਟ ਈਰੇਜ਼’ ਦੀ ਸ਼ੁਰੂਆਤ ਕੀਤੀ ਗਈ ਸੀ। ਇਸ ਮੁਹਿੰਮ ਵਿੱਚ ਪੀਲ ਪੁਲਿਸ ਤੋਂ ਇਲਾਵਾ ਓਪੀਪੀ (OPP), ਟੋਰਾਂਟੋ, ਯੌਰਕ, ਹਾਲਟਨ ਅਤੇ ਹੈਮਿਲਟਨ ਦੀ ਪੁਲਿਸ ਵੀ ਸਾਂਝੇ ਤੌਰ 'ਤੇ ਕੰਮ ਕਰ ਰਹੀ ਹੈ। ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਅਜਿਹੀਆਂ ਗੈਰ-ਕਾਨੂੰਨੀ ਗਤੀਵਿਧੀਆਂ ਦੌਰਾਨ ਬਹੁਤ ਤੇਜ਼ ਰਫ਼ਤਾਰ ਨਾਲ ਗੱਡੀਆਂ ਚਲਾਉਣਾ, ਲੇਨਾਂ ਕੱਟਣਾ, ਟਾਇਰਾਂ ਤੋਂ ਖ਼ਤਰਨਾਕ ਆਵਾਜ਼ਾਂ ਕੱਢਣਾ ਅਤੇ ਸਟੰਟ ਕਰਨਾ ਆਮ ਨਗਰਿਕਾਂ ਦੀ ਜਾਨ ਲਈ ਵੱਡਾ ਖ਼ਤਰਾ ਬਣਦਾ ਹੈ, ਜਿਸ ਵਿਰੁੱਧ ਕਾਰਵਾਈ ਅੱਗੇ ਵੀ ਜਾਰੀ ਰਹੇਗੀ।