ਲੁਧਿਆਣਾ ਦੇ ਬਹੁ-ਚਰਚਿਤ ਮਾਸੂਮ ਦਿਲਰੋਜ਼ ਕਤਲ ਕਾਂਡ ਵਿੱਚ ਮਾਨਯੋਗ ਹਾਈ ਕੋਰਟ ਵੱਲੋਂ ਇੱਕ ਅਹਿਮ ਫ਼ੈਸਲਾ ਸੁਣਾਇਆ ਗਿਆ ਹੈ। ਅਦਾਲਤ ਨੇ ਮਾਸੂਮ ਬੱਚੀ ਨੂੰ ਜ਼ਿੰਦਾ ਦਫ਼ਨਾ ਕੇ ਹੱਤਿਆ ਕਰਨ ਵਾਲੀ ਗੁਆਂਢਣ ਔਰਤ ਦੀ ਮੌਤ (ਫਾਂਸੀ) ਦੀ ਸਜ਼ਾ ਨੂੰ ਉਮਰ ਕੈਦ ਵਿੱਚ ਤਬਦੀਲ ਕਰ ਦਿੱਤਾ ਹੈ। ਹਾਈ ਕੋਰਟ ਦੇ ਨਵੇਂ ਹੁਕਮਾਂ ਅਨੁਸਾਰ, ਦੋਸ਼ੀ ਔਰਤ ਨੂੰ ਹੁਣ 30 ਸਾਲ ਦੀ ਕੈਦ ਦੀ ਸਜ਼ਾ ਭੁਗਤਣੀ ਪਵੇਗੀ ਅਤੇ ਇਸ ਪੂਰੇ ਸਮੇਂ ਦੌਰਾਨ ਉਸ ਨੂੰ ਕਿਸੇ ਵੀ ਤਰ੍ਹਾਂ ਦੀ ਕਾਨੂੰਨੀ ਛੋਟ ਨਹੀਂ ਮਿਲੇਗੀ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਲਗਭਗ ਦੋ ਸਾਲ ਪਹਿਲਾਂ ਸੈਸ਼ਨ ਕੋਰਟ ਨੇ ਦੋਸ਼ੀ ਔਰਤ ਨੂੰ ਮੌਤ ਦੀ ਸਜ਼ਾ ਸੁਣਾਈ ਸੀ। ਖਿਡੌਣਿਆਂ ਨੂੰ ਲੈ ਕੇ ਮਨ 'ਚ ਆਈ ਸੀ ਈਰਖਾ ਮਾਮਲੇ ਦੀ ਪਿਛੋਕੜ ਅਨੁਸਾਰ, ਦੋਸ਼ੀ ਔਰਤ ਨੇ ਮਾਸੂਮ ਦਿਲਰੋਜ਼ ਦਾ ਕਤਲ ਸਿਰਫ਼ ਇਸ ਈਰਖਾ ਵਿੱਚ ਕੀਤਾ ਸੀ ਕਿ ਦਿਲਰੋਜ਼ ਦੇ ਪਿਤਾ ਆਪਣੀ ਧੀ ਲਈ ਅਕਸਰ ਨਵੇਂ ਖਿਡੌਣੇ ਅਤੇ ਹੋਰ ਸਾਮਾਨ ਲਿਆ ਕੇ ਦਿੰਦੇ ਸਨ। ਬੱਚੀ ਦੇ ਖਿਡੌਣਿਆਂ ਨੂੰ ਦੇਖ ਕੇ ਦੋਸ਼ੀ ਔਰਤ ਦੇ ਆਪਣੇ ਬੱਚੇ ਵੀ ਉਸ ਕੋਲੋਂ ਅਜਿਹੇ ਖਿਡੌਣਿਆਂ ਦੀ ਮੰਗ ਕਰਦੇ ਸਨ। ਆਰਥਿਕ ਅਸਮਰੱਥਾ ਕਾਰਨ ਉਹ ਆਪਣੇ ਬੱਚਿਆਂ ਦੀਆਂ ਇਹ ਮੰਗਾਂ ਪੂਰੀਆਂ ਨਹੀਂ ਕਰ ਸਕਦੀ ਸੀ, ਜਿਸ ਤੋਂ ਖ਼ਫ਼ਾ ਹੋ ਕੇ ਉਸ ਨੇ ਗੁੱਸੇ ਅਤੇ ਨਫ਼ਰਤ ਵਿੱਚ ਮਾਸੂਮ ਬੱਚੀ ਨੂੰ ਜ਼ਿੰਦਾ ਦਫ਼ਨਾ ਕੇ ਮਾਰਨ ਦੀ ਖ਼ੌਫ਼ਨਾਕ ਸਾਜ਼ਿਸ਼ ਰਚੀ। ਐਕਟਿਵਾ 'ਤੇ ਲਿਜਾ ਕੇ ਸੁੰਨਸਾਨ ਜਗ੍ਹਾ 'ਚ ਕੀਤਾ ਸੀ ਜ਼ਿੰਦਾ ਦਫ਼ਨ ਇਹ ਦਰਦਨਾਕ ਘਟਨਾ 28 ਨਵੰਬਰ 2021 ਨੂੰ ਵਾਪਰੀ ਸੀ। ਦੋਸ਼ੀ ਔਰਤ ਬੱਚੀ ਦਿਲਰੋਜ਼ ਨੂੰ ਆਪਣੀ ਐਕਟਿਵਾ 'ਤੇ ਬਿਠਾ ਕੇ ਇੱਕ ਸੁੰਨਸਾਨ ਇਲਾਕੇ ਵਿੱਚ ਲੈ ਗਈ, ਜਿੱਥੇ ਉਸ ਨੇ ਪਹਿਲਾਂ ਤੋਂ ਪੁੱਟੇ ਹੋਏ ਇੱਕ ਟੋਏ ਵਿੱਚ ਬੱਚੀ ਨੂੰ ਜ਼ਿੰਦਾ ਦਫ਼ਨਾ ਦਿੱਤਾ। ਬੱਚੀ ਦੇ ਲਾਪਤਾ ਹੋਣ ਤੋਂ ਬਾਅਦ ਜਦੋਂ ਇਲਾਕੇ ਦੇ ਸੀਸੀਟੀਵੀ (CCTV) ਕੈਮਰਿਆਂ ਦੀ ਜਾਂਚ ਕੀਤੀ ਗਈ ਤਾਂ ਔਰਤ ਬੱਚੀ ਨੂੰ ਸਕੂਟਰੀ 'ਤੇ ਲਿਜਾਂਦੀ ਹੋਈ ਕੈਮਰੇ 'ਚ ਕੈਦ ਮਿਲੀ। ਪੁਲਿਸ ਪੁੱਛਗਿੱਛ ਦੌਰਾਨ ਦੋਸ਼ੀ ਔਰਤ ਨੇ ਆਪਣਾ ਗੁਨਾਹ ਕਬੂਲ ਕਰ ਲਿਆ, ਜਿਸ ਤੋਂ ਬਾਅਦ ਉਸ ਦੀ ਨਿਸ਼ਾਨਦੇਹੀ 'ਤੇ ਮਾਸੂਮ ਦੀ ਲਾਸ਼ ਬਰਾਮਦ ਕੀਤੀ ਗਈ ਸੀ। ਦੋ ਸਾਲ ਪਹਿਲਾਂ ਸੈਸ਼ਨ ਅਦਾਲਤ ਨੇ ਇਸ ਨੂੰ ਦੁਰਲੱਭ ਤੋਂ ਦੁਰਲੱਭ ਮਾਮਲਾ ਮੰਨਦਿਆਂ ਦੋਸ਼ੀ ਨੂੰ ਫਾਂਸੀ ਦੀ ਸਜ਼ਾ ਸੁਣਾਈ ਸੀ, ਜਿਸ ਨੂੰ ਹੁਣ ਹਾਈਕੋਰਟ ਨੇ 30 ਸਾਲ ਦੀ ਬਿਨਾਂ ਛੋਟ ਵਾਲੀ ਉਮਰ ਕੈਦ ਵਿੱਚ ਬਦਲ ਦਿੱਤਾ ਹੈ।