ਨੇਪਾਲ ਦੇ ਸੋਲੁਖੁੰਬੂ ਜ਼ਿਲ੍ਹੇ ਵਿੱਚ ਮੰਗਲਵਾਰ ਸਵੇਰੇ ਉਤਰਦੇ (ਲੈਂਡਿੰਗ ਕਰਦੇ) ਸਮੇਂ ਦੋ ਹੈਲੀਕਾਪਟਰਾਂ ਦੀ ਆਪਸ ਵਿੱਚ ਭਿਆਨਕ ਟੱਕਰ ਹੋ ਗਈ। ਇਸ ਦਰਦਨਾਕ ਹਾਦਸੇ ਵਿੱਚ 47 ਸਾਲਾ ਇੱਕ ਭਾਰਤੀ ਨਾਗਰਿਕ ਦੀ ਮੌਤ ਹੋ ਗਈ, ਜਦਕਿ ਇੱਕ ਹੋਰ ਯਾਤਰੀ ਅਤੇ ਦੋਵੇਂ ਹੈਲੀਕਾਪਟਰਾਂ ਦੇ ਪਾਇਲਟ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਏ। ਨੇਪਾਲ ਪੁਲੀਸ ਵੱਲੋਂ ਜਾਰੀ ਰਸਮੀ ਬਿਆਨ ਅਨੁਸਾਰ ਇਹ ਹਾਦਸਾ ਸੋਲੁਖੁੰਬੂ ਜ਼ਿਲ੍ਹੇ ਦੀ ਖੁੰਬੂ ਪਾਸਾਂਗ ਲ੍ਹਾਮੂ ਦਿਹਾਤੀ ਨਗਰਪਾਲਿਕਾ ਦੇ ਵਾਰਡ ਨੰਬਰ 4 ਵਿੱਚ ਸਥਿਤ ਫੇਰੀਚੇ ਇਲਾਕੇ ਵਿਖੇ ਵਾਪਰਿਆ। ਜ਼ਿਲ੍ਹਾ ਪੁਲੀਸ ਦਫ਼ਤਰ ਅਨੁਸਾਰ 'ਫਿਸ਼ਟੇਲ ਏਅਰ' ਅਤੇ 'ਏਅਰ ਡਾਇਨੈਸਟੀ' ਕੰਪਨੀਆਂ ਦੇ ਹੈਲੀਕਾਪਟਰਾਂ ਵਿਚਾਲੇ ਇਹ ਟੱਕਰ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 8:11 ਵਜੇ ਹੋਈ। ਭਾਰਤੀ ਨਾਗਰਿਕ ਦੀ ਮੌਤ, ਨਿਊਜ਼ੀਲੈਂਡ ਵਾਸੀ ਜ਼ਖ਼ਮੀ ਪੁਲੀਸ ਇੰਸਪੈਕਟਰ ਮੌਸਮ ਤਮਾਂਗ ਨੇ ਦੱਸਿਆ ਕਿ ਹਾਦਸੇ ਵਿੱਚ ਜਾਨ ਗਵਾਉਣ ਵਾਲੇ ਵਿਅਕਤੀ ਦੀ ਪਛਾਣ 47 ਸਾਲਾ ਭਾਰਤੀ ਨਾਗਰਿਕ ਵਸੰਤ ਕੁਮਾਰ ਬਾਲਾਰਾਮਾਰਾਮਾਡੂ ਵਜੋਂ ਹੋਈ ਹੈ। ਉਹ ਘਟਨਾ ਸਮੇਂ ਫਿਸ਼ਟੇਲ ਏਅਰ ਦੇ ਹੈਲੀਕਾਪਟਰ ਵਿੱਚ ਸਵਾਰ ਸੀ। ਇਸੇ ਹੈਲੀਕਾਪਟਰ ਵਿੱਚ ਸਵਾਰ 49 ਸਾਲਾ ਸ਼ੈਲੇਸ਼ ਕ੍ਰਿਸ਼ਨਾ ਪਟੇਲ ਵੀ ਹਾਦਸੇ 'ਚ ਜ਼ਖ਼ਮੀ ਹੋਏ ਹਨ, ਜੋ ਕਿ ਭਾਰਤੀ ਮੂਲ ਦੇ ਨਿਊਜ਼ੀਲੈਂਡ ਨਿਵਾਸੀ ਹਨ। ਪੁਲੀਸ ਇੰਸਪੈਕਟਰ ਅਨੁਸਾਰ ਜ਼ਖ਼ਮੀ ਸ਼ੈਲੇਸ਼ ਨੂੰ ਤੁਰੰਤ 'ਪ੍ਰਭੂ ਹੈਲੀਕਾਪਟਰ' ਰਾਹੀਂ ਇਲਾਜ ਲਈ ਕਾਠਮੰਡੂ ਦੇ ਮੈਡੀਸਿਟੀ ਹਸਪਤਾਲ ਪਹੁੰਚਾਇਆ ਗਿਆ ਹੈ। ਦੋਵੇਂ ਨੇਪਾਲੀ ਪਾਇਲਟ ਵੀ ਹੋਏ ਜ਼ਖ਼ਮੀ ਟੱਕਰ ਦੌਰਾਨ ਦੋਵਾਂ ਹੈਲੀਕਾਪਟਰਾਂ ਨੂੰ ਉਡਾ ਰਹੇ ਨੇਪਾਲੀ ਪਾਇਲਟ ਵੀ ਜ਼ਖ਼ਮੀ ਹੋਏ ਹਨ। ਹਾਦਸੇ ਵਿੱਚ ਫਿਸ਼ਟੇਲ ਏਅਰ ਦੇ ਪਾਇਲਟ ਰਵਿੰਦਰ ਪ੍ਰਜਾਪਤੀ ਅਤੇ ਡਾਇਨੈਸਟੀ ਏਅਰ ਦੇ ਪਾਇਲਟ ਪ੍ਰਜਵਲ ਕੇ.ਸੀ. ਜ਼ਖ਼ਮੀ ਹੋਏ ਹਨ। ਦੋਵਾਂ ਪਾਇਲਟਾਂ ਨੂੰ ਅੱਗੇ ਦੇ ਹਸਪਤਾਲੀ ਇਲਾਜ ਲਈ ਕਾਠਮੰਡੂ ਭੇਜਿਆ ਗਿਆ ਹੈ। ਐਵਰੈਸਟ ਬੇਸ ਕੈਂਪ ਦੇ ਰਸਤੇ ਵਿੱਚ ਵਾਪਰਿਆ ਹਾਦਸਾ ਹਾਦਸੇ ਵਾਲੀ ਥਾਂ ਫੇਰੀਚੇ, ਰਾਜਧਾਨੀ ਕਾਠਮੰਡੂ ਤੋਂ ਲਗਪਗ 150 ਕਿਲੋਮੀਟਰ ਉੱਤਰ-ਪੂਰਬ ਵੱਲ ਸਥਿਤ ਹੈ ਅਤੇ ਇਹ ਮਾਊਂਟ ਐਵਰੈਸਟ ਦੇ ਬੇਸ ਕੈਂਪ ਵੱਲ ਜਾਣ ਵਾਲੇ ਮੁੱਖ ਰਸਤੇ ਵਿੱਚ ਪੈਂਦਾ ਹੈ। ਪੁਲੀਸ ਨੇ ਦੱਸਿਆ ਕਿ ਮ੍ਰਿਤਕ ਭਾਰਤੀ ਨਾਗਰਿਕ ਦੀ ਦੇਹ ਨੂੰ ਲੁਕਲਾ ਦੇ ਇੱਕ ਸਥਾਨਕ ਹਸਪਤਾਲ ਵਿੱਚ ਰਖਵਾਇਆ ਗਿਆ ਹੈ। ਹਾਦਸੇ ਦੇ ਵਕਤ ਦੋਵਾਂ ਹੈਲੀਕਾਪਟਰਾਂ ਵਿੱਚ ਕੁੱਲ ਕਿੰਨੇ ਯਾਤਰੀ ਸਵਾਰ ਸਨ, ਇਸ ਬਾਰੇ ਅਜੇ ਅਧਿਕਾਰਤ ਪੁਸ਼ਟੀ ਨਹੀਂ ਹੋ ਸਕੀ। ਪੁਲੀਸ ਅਧਿਕਾਰੀਆਂ ਨੇ ਦੱਸਿਆ ਕਿ ਘਟਨਾ ਦੇ ਅਸਲ ਕਾਰਨਾਂ ਅਤੇ ਹੋਰ ਵੇਰਵਿਆਂ ਬਾਰੇ ਜਾਣਕਾਰੀ ਇਕੱਠੀ ਕੀਤੀ ਜਾ ਰਹੀ ਹੈ।