14 ਗੋਰਖਾ ਟਰੇਨਿੰਗ ਸੈਂਟਰ ਸੁਬਾਥੂ ਤੋਂ ਚੌਥੇ ਬੈਚ ਦੇ 307 ਅਗਨੀਵੀਰ ਪਾਸ ਆਊਟ ਹੋਏ

ਚੰਡੀਗੜ੍ਹ/ ਸੁਬਾਥੂ : ਹਿਮਾਚਲ ਪ੍ਰਦੇਸ਼ ਦੇ ਸੁਬਾਥੂ ਵਿੱਚ ਸਥਿਤ 14 ਗੋਰਖਾ ਟਰੇਨਿੰਗ ਕੇਂਦਰ (ਜੀਟੀਸੀ) ਤੋਂ ਅੱਜ ਚੌਥੇ ਬੈਚ ਦੇ 307 ਅਗਨੀਵੀਰ ਸੈਨਿਕ ਬਹਾਦਰੀ ਅਤੇ ਸਵੈਮਾਣ ਦਾ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਪਾਸ ਆਊਟ ਹੋਏ। ਇਹ ਅਗਨੀਵੀਰ, ਜਿਨ੍ਹਾਂ ਨੇ ਭਾਰਤ ਦੇ ਗਣਰਾਜ ਪ੍ਰਤੀ ਵਫ਼ਾਦਾਰੀ ਦੀ ਸਹੁੰ ਚੁੱਕੀ ਹੈ, ਹੁਣ ਭਾਰਤੀ ਸੈਨਾ ਦੀ ਪਹਿਲੀ ਅਤੇ ਚੌਥੀ ਗੋਰਖਾ ਰਾਈਫਲਜ਼ ਦੀਆਂ ਸ਼ਾਨਦਾਰ ਗੋਰਖਾ ਬਟਾਲੀਅਨਾਂ ਵਿੱਚ ਸ਼ਾਮਲ ਹੋਣਗੇ, ਜਿਨ੍ਹਾਂ ਦਾ 200 ਸਾਲਾਂ ਤੋਂ ਵੱਧ ਬਹਾਦਰੀ ਅਤੇ ਕੁਰਬਾਨੀਆਂ ਦਾ ਇੱਕ ਅਮੀਰ ਅਤੇ ਸ਼ਾਨਦਾਰ ਫੌਜੀ ਇਤਿਹਾਸ ਹੈ।ਪਾਸਿੰਗ ਆਊਟ ਪਰੇਡ ਦਾ ਨਿਰੀਖਣ 14 ਜੀਟੀਸੀ ਦੇ ਕਮਾਂਡੈਂਟ ਬ੍ਰਿਗੇਡੀਅਰ ਪੀਪੀ ਸਿੰਘ ਨੇ ਕੀਤਾ, ਜੋ ਕਿ ਅਗਨੀਵੀਰਾਂ ਦੀ ਸਰੀਰਕ ਤੰਦਰੁਸਤੀ, ਯੁੱਧ ਅਤੇ ਫੀਲਡ ਕਰਾਫਟ, ਹਥਿਆਰਾਂ ਅਤੇ ਰਣਨੀਤੀ ਵਿੱਚ 31 ਹਫ਼ਤਿਆਂ ਦੀ ਸਖ਼ਤ ਸਿਖਲਾਈ ਦੀ ਪੂਰੇ ਹੋਣ ਉਪਰੰਤ ਆਯੋਜਿਤ ਕੀਤੀ ਗਈ। ਬ੍ਰਿਗੇਡੀਅਰ ਪੀ.ਪੀ ਸਿੰਘ ਨੇ ਆਪਣੇ ਸੰਬੋਧਨ ਵਿੱਚ ਨੌਜਵਾਨ ਅਗਨੀਵੀਰਾਂ ਨੂੰ ਦੇਸ਼ ਦੀਆਂ ਸਾਰੀਆਂ ਸਰਹੱਦਾਂ 'ਤੇ ਰਾਸ਼ਟਰੀ ਅਤੇ ਭਾਰਤੀ ਫੌਜ ਦੇ ਝੰਡੇ ਬੁਲੰਦ ਰੱਖਣ ਲਈ ਪ੍ਰੇਰਿਤ ਕੀਤਾ।ਪਰੇਡ ਤੋਂ ਬਾਅਦ ਆਕਰਸ਼ਕ ਪਾਈਪ ਬੈਂਡ ਪੇਸ਼ਕਾਰੀ ਅਤੇ ਸ਼ਾਨਦਾਰ ਸਰੀਰਕ ਕੌਸ਼ਲ ਨੇ ਦਰਸ਼ਕਾਂ ਦਾ ਮਨ ਮੋਹ ਲਿਆ। ਇਸ ਸਮਾਗਮ ਵਿੱਚ 350 ਤੋਂ ਵੱਧ ਲੋਕ ਸ਼ਾਮਲ ਹੋਏ, ਜਿਨ੍ਹਾਂ ਵਿੱਚ ਸੇਵਾ ਕਰ ਰਹੇ ਕਰਮਚਾਰੀ, ਸਾਬਕਾ ਸੈਨਿਕ, ਅਗਨੀਵੀਰਾਂ ਦੇ ਮਾਤਾ-ਪਿਤਾ ਅਤੇ ਰਿਸ਼ਤੇਦਾਰ ਸ਼ਾਮਲ ਸਨ।