ਰੂਸ-ਯੂਕਰੇਨ ਜੰਗ ’ਤੇ ਟਰੰਪ ਪੱਕਾ ਹੱਲ ਚਾਹੁੰਦੇ: ਰੂਬੀਓ

ਅਮਰੀਕਾ ਦੇ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨੇ ਕਿਹਾ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਦਾ ਇਰਾਦਾ ਰੂਸ ਯੂਕਰੇਨ ਜੰਗ ਹਮੇਸ਼ਾ ਲਈ ਖ਼ਤਮ ਕਰਾਉਣ ਦਾ ਹੈ। ਉਨ੍ਹਾਂ ਇੱਥੇ ਮਿਊਨਿਖ਼ ਸੁਰੱਖਿਆ ਕਾਨਫਰੰਸ ਦੌਰਾਨ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੈਂਸਕੀ ਨਾਲ ਮੁਲਾਕਾਤ ਕੀਤੀ। ਮਾਰਕੋ ਰੂਬੀਓ ਨੇ ਐਕਸ ’ਤੇ ਲਿਖਿਆ, ‘‘ਯੂਕਰੇਨ ਦੀ ਸੁਰੱਖਿਆ, ਰੱਖਿਆ ਅਤੇ ਆਰਥਿਕ ਭਾਈਵਾਲੀ ਮਜ਼ਬੂਤ ਕਰਨ ਲਈ ਯੂਕਰੇਨ ਦੇ ਰਾਸ਼ਟਰਪਤੀ ਜ਼ੇਲੈਂਸਕੀ ਨਾਲ ਮੁਲਾਕਾਤ ਕੀਤੀ। ਰਾਸ਼ਟਰਪਤੀ ਟਰੰਪ ਅਜਿਹਾ ਹੱਲ ਚਾਹੁੰਦੇ ਹਨ ਜਿਸ ਨਾਲ ਖੂਨ-ਖਰਾਬਾ ਹਮੇਸ਼ਾ ਲਈ ਖ਼ਤਮ ਹੋ ਜਾਵੇ।’’ ਇਹ ਮੁਲਾਕਾਤ ਯੂਕਰੇਨ, ਰੂਸ ਅਤੇ ਅਮਰੀਕਾ ਦਰਮਿਆਨ 17-18 ਫਰਵਰੀ ਨੂੰ ਜਨੇਵਾ ’ਚ ਹੋਣ ਵਾਲੀ ਤਿੰਨ ਧਿਰੀ ਮੀਟਿੰਗ ਦੇ ਪਿਛੋਕੜ ’ਚ ਹੋਈ ਹੈ। ਇਸ ਤੋਂ ਪਹਿਲਾਂ ਸ੍ਰੀ ਜ਼ੇਲੈਂਸਕੀ ਨੇ ਕਿਹਾ ਕਿ ਉਨ੍ਹਾਂ ਸ਼ਾਂਤੀ ਵਾਰਤਾ ਤੋਂ ਪਹਿਲਾਂ ਸ੍ਰੀ ਰੂਬੀਓ ਨੂੰ ਚੱਲ ਰਹੀ ਜੰਗ ਦਰਮਿਆਨ ਯੂਕਰੇਨ ਦੀ ਸਥਿਤੀ ਬਾਰੇ ਜਾਣਕਾਰੀ ਦਿੱਤੀ। ਉਨ੍ਹਾਂ ਸ੍ਰੀ ਰੂਬੀਓ ਨਾਲ ਯੂਕਰੇਨ ਦੇ ਊਰਜਾ ਸਰੋਤਾਂ ’ਤੇ ਰੂਸੀ ਹਮਲਿਆਂ ਦੇ ਅਸਰ ਬਾਰੇ ਵੀ ਚਰਚਾ ਕੀਤੀ। ਸ੍ਰੀ ਜ਼ੇਲੈਂਸਕੀ ਨੇ ਐਕਸ ’ਤੇ ਲਿਖਿਆ, ‘‘ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨਾਲ ਮੀਟਿੰਗ ਦੌਰਾਨ ਮੈਂ ਉਨ੍ਹਾਂ ਨੂੰ ਮੋਰਚੇ ਦੀ ਸਥਿਤੀ, ਰੂਸੀ ਹਮਲਿਆਂ ਤੇ ਯੂਕਰੇਨ ਦੀ ਊਰਜਾ ਪ੍ਰਣਾਲੀ ’ਤੇ ਹਮਲਿਆਂ ਦੇ ਪ੍ਰਭਾਵ ਬਾਰੇ ਜਾਣਕਾਰੀ ਦਿੱਤੀ। ਅਸੀਂ ਇਸ ਗੱਲ ’ਤੇ ਚਰਚਾ ਕੀਤੀ ਕਿ ਸਰਦੀਆਂ ਦੀ ਠੰਢ ਦੌਰਾਨ ਯੂਕਰੇਨ ਦੇ ਲੋਕਾਂ ਦੀ ਕਿਸ ਤਰ੍ਹਾਂ ਮਦਦ ਕੀਤੀ ਜਾਵੇ। ਅਸੀਂ ਕੂਟਨੀਤਕ ਪ੍ਰਕਿਰਿਆ ਤੇ ਤਿੰਨ ਧਿਰੀ ਮੀਟਿੰਗਾਂ ਬਾਰੇ ਵੀ ਗੱਲਬਾਤ ਕੀਤੀ।’’ ਇਸ ਤੋਂ ਪਹਿਲਾਂ ਬੀਤੇ ਦਿਨ ਯੂਕਰੇਨ ਦੇ ਰਾਸ਼ਟਰਪਤੀ ਨੇ ਜਨੇਵਾ ’ਚ ਹੋਣ ਵਾਲੀ ਮੀਟਿੰਗ ਬਾਰੇ ਅਮਰੀਕੀ ਦੂਤਾਂ ਸਟੀਵ ਵਿਟਕੌਫ ਤੇ ਜੈਰੇਡ ਕੁਸ਼ਨਰ ਨਾਲ ਚਰਚਾ ਕੀਤੀ ਅਤੇ ਕਿਹਾ ਕਿ ਕੀਵ ਨੂੰ ਉਮੀਦ ਹੈ ਕਿ ਵਾਰਤਾ ਸਕਾਰਾਤਮਕ ਹੋਵੇਗੀ।