ਪੁਣੇ ਯੂਨੀਵਰਸਿਟੀ ਨਾਲ 2.46 ਕਰੋੜ ਦੀ ਠੱਗੀ, ਇੰਜੀਨੀਅਰ ਗ੍ਰਿਫ਼ਤਾਰ

ਪੁਣੇ ਪੁਲੀਸ ਨੇ ਤਿਲੰਗਾਨਾ-ਅਧਾਰਿਤ ਇੱਕ ਇਲੈਕਟ੍ਰੋਨਿਕਸ ਇੰਜੀਨੀਅਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਸ ਕੋਲ ਯੂਕੇ-ਅਧਾਰਿਤ ਯੂਨੀਵਰਸਿਟੀ ਤੋਂ ਡਾਕਟਰੇਟ (ਪੀ.ਐਚ.ਡੀ.) ਦੀ ਡਿਗਰੀ ਹੈ। ਉਸ ’ਤੇ ਇੱਕ ਪ੍ਰਾਈਵੇਟ ਯੂਨੀਵਰਸਿਟੀ ਨਾਲ 2.46 ਕਰੋੜ ਦੀ ਆਨਲਾਈਨ ਧੋਖਾਧੜੀ ਕਰਨ ਦਾ ਇਲਜ਼ਾਮ ਹੈ। ਅਧਿਕਾਰੀਆਂ ਨੇ...

ਪੁਣੇ ਪੁਲੀਸ ਨੇ ਤਿਲੰਗਾਨਾ-ਅਧਾਰਿਤ ਇੱਕ ਇਲੈਕਟ੍ਰੋਨਿਕਸ ਇੰਜੀਨੀਅਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜਿਸ ਕੋਲ ਯੂਕੇ-ਅਧਾਰਿਤ ਯੂਨੀਵਰਸਿਟੀ ਤੋਂ ਡਾਕਟਰੇਟ (ਪੀ.ਐਚ.ਡੀ.) ਦੀ ਡਿਗਰੀ ਹੈ। ਉਸ ’ਤੇ ਇੱਕ ਪ੍ਰਾਈਵੇਟ ਯੂਨੀਵਰਸਿਟੀ ਨਾਲ 2.46 ਕਰੋੜ ਦੀ ਆਨਲਾਈਨ ਧੋਖਾਧੜੀ ਕਰਨ ਦਾ ਇਲਜ਼ਾਮ ਹੈ।

ਅਧਿਕਾਰੀਆਂ ਨੇ ਦੱਸਿਆ ਕਿ ਯੂਨੀਵਰਸਿਟੀ ਨੇ ਸਤੰਬਰ ਦੇ ਪਹਿਲੇ ਹਫ਼ਤੇ ਪੁਲੀਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਸੀ ਕਿ ਸੰਸਥਾ ਨਾਲ ਇੱਕ ਆਨਲਾਈਨ ਠੱਗ ਵੱਲੋਂ ਕਥਿਤ ਤੌਰ ’ਤੇ 2.46 ਕਰੋੜ ਦੀ ਠੱਗੀ ਮਾਰੀ ਗਈ, ਜਿਸ ਨੇ ਖ਼ੁਦ ਨੂੰ ਇੰਡੀਅਨ ਇੰਸਟੀਚਿਊਟ ਆਫ਼ ਟੈਕਨਾਲੋਜੀ ਬੰਬੇ (IIT Bombay) ਦੇ ਪ੍ਰੋਫੈਸਰ ਵਜੋਂ ਪੇਸ਼ ਕੀਤਾ ਸੀ।

ਪੁਲੀਸ ਰਿਲੀਜ਼ ਨੇ ਬੁੱਧਵਾਰ ਨੂੰ ਦੱਸਿਆ ਕਿ ਠੱਗ ਨੇ ਪੁਣੇ-ਅਧਾਰਿਤ ਯੂਨੀਵਰਸਿਟੀ ਦੇ ਅਧਿਕਾਰੀਆਂ ਨੂੰ ਆਈ.ਆਈ.ਟੀ. ਬੰਬੇ ਤੋਂ ਇੱਕ ਪ੍ਰੋਜੈਕਟ ਲੈਣ ਵਿੱਚ ਮਦਦ ਕਰਨ ਦਾ ਵਾਅਦਾ ਕੀਤਾ ਸੀ।

ਕਥਿਤ ਆਨਲਾਈਨ ਧੋਖਾਧੜੀ ਇਸ ਸਾਲ 25 ਜੁਲਾਈ ਤੋਂ 26 ਅਗਸਤ ਦੇ ਵਿਚਕਾਰ ਹੋਈ ਜਿਸ ਦੌਰਾਨ ਠੱਗ ਨੇ ਆਈ.ਆਈ.ਟੀ.ਬੀ. ਦੇ ਪ੍ਰੋਫੈਸਰ ਵਜੋਂ ਪੇਸ਼ ਹੋ ਕੇ ਯੂਨੀਵਰਸਿਟੀ ਨੂੰ ਵੱਖ-ਵੱਖ ਖਾਤਿਆਂ ਵਿੱਚ 2.46 ਕਰੋੜ ਟਰਾਂਸਫਰ ਕਰਵਾ ਕੇ ਠੱਗਿਆ।

ਸਾਈਬਰ ਕ੍ਰਾਈਮ ਪੁਲੀਸ ਸਟੇਸ਼ਨ ਦੀ ਇੱਕ ਟੀਮ ਨੇ ਇਸ ਦੀ ਜਾਂਚ ਸ਼ੁਰੂ ਕੀਤੀ ਅਤੇ ਸ਼ੱਕੀ ਵਿਅਕਤੀ ਨੂੰ ਫੜ੍ਹਿਆ, ਜਿਸ ਦੀ ਪਛਾਣ ਸੀਤੱਈਆ ਕਿਲਾਰੂ (34) ਵਾਸੀ ਯਪਰਾਲ ਹੈਦਰਾਬਾਦ, ਤੇਲੰਗਾਨਾ ਵਜੋਂ ਹੋਈ ਹੈ।

ਇੱਕ ਪੁਲੀਸ ਅਧਿਕਾਰੀ ਨੇ ਕਿਹਾ, ‘‘ਉਹ ਇਸ ਕੇਸ ਦਾ ਮਾਸਟਰਮਾਈਂਡ ਹੈ ਅਤੇ ਉਸਨੂੰ 21 ਸਤੰਬਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਦੋਸ਼ੀ ਤੇਲੰਗਾਨਾ ਤੋਂ ਇਲੈਕਟ੍ਰੋਨਿਕਸ ਅਤੇ ਦੂਰਸੰਚਾਰ ਇੰਜੀਨੀਅਰ ਹੈ ਅਤੇ ਯੂਕੇ-ਅਧਾਰਿਤ ਯੂਨੀਵਰਸਿਟੀ ਤੋਂ ਪੀ.ਐਚ.ਡੀ. ਦੀ ਡਿਗਰੀ ਰੱਖਦਾ ਹੈ। ਜਾਂਚ ਦੌਰਾਨ, ਉਸ ਨੇ ਸਾਨੂੰ ਦੱਸਿਆ ਕਿ ਉਸਨੇ 2019-20 ਵਿੱਚ ਯੂ.ਪੀ.ਐਸ.ਸੀ. ਦੀ ਪ੍ਰੀਲਿਮ ਅਤੇ ਮੇਨਜ਼ ਪ੍ਰੀਖਿਆ ਪਾਸ ਕੀਤੀ ਸੀ।’’

ਗ੍ਰਿਫ਼ਤਾਰ ਕੀਤੇ ਜਾਣ ਤੋਂ ਬਾਅਦ ਕਿਲਾਰੂ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿਸ ਨੇ ਉਸਨੂੰ 28 ਸਤੰਬਰ ਤੱਕ ਪੁਲਿਸ ਹਿਰਾਸਤ ਵਿੱਚ ਭੇਜ ਦਿੱਤਾ।