ਸੀਵਰੇਜ ਦੇ ਪਾਣੀ ਦਾ ਪੱਕਾ ਹੱਲ ਕਰਵਾਉਣ ਲਈ ਠੀਕਰੀਵਾਲਾ ਚੌਕ ’ਚ ਲਾਇਆ ਧਰਨਾ

 ਮਾਨਸਾ : ਸ਼ਹਿਰ ਵਿਚਲੇ ਸੀਵਰੇਜ਼ ਦੇ ਪਾਣੀ ਦਾ ਦਰੁਸਤ ਹੱਲ ਕਰਵਾਉਣ ਲਈ ਠੀਕਰੀਵਾਲਾ ਚੌਂਕ ਵਿਖੇ ਪੰਜਾਬ ਕਿਸਾਨ ਯੂਨੀਅਨ ਦੀ ਅਗਵਾਈ ਹੇਠ ਧਰਨਾ ਲਗਾਇਆ ਗਿਆ। ਧਰਨੇ ਦੇ 40ਵੇਂ ਦਿਨ ਧਰਨੇ ਤੋਂ ਪੰਜਾਬ ਕਿਸਾਨ ਯੂਨੀਅਨ ਦੇ ਸੂਬਾਈ ਆਗੂ ਰੁਲਦੂ ਸਿੰਘ ਮਾਨਸਾ ਤੇ ਪ੍ਰੈਸ ਸਕੱਤਰ ਨਰਿੰਦਰ ਕੌਰ ਬੁਰਜ ਹਮੀਰਾ ਨੇ ਕਿਹਾ ਕਿ ਸੀਵਰੇਜ ਦਾ ਮਸਲਾ ਪਿਛਲੇ ਲੰਬੇ ਸਮੇਂ ਤੋਂ ਉਲਝਿਆ ਹੋਇਆ ਹੈ। ਇਸ ਦੇ ਪੁਖਤਾ ਹੱਲ ਕਰਨ ਦੀ ਸ਼ਹਿਰ ਦੇ ਵਾਰਡਾਂ ਦੀਆਂ ਗਲੀਆਂ ਉੱਚੀਆਂ ਕਰਨ, ਦੁਆਰਾ ਬਣਾਉਣ ਦਾ ਸਿਲਸਿਲਾ ਚਲਦਾ ਰਹਿੰਦਾ ਹੈ। ਇਸ ਨਾਲ ਸ਼ਹਿਰੀਆਂ ਦੇ ਬਣੇ ਮਕਾਨ ਨੀਵੇਂ ਹੋ ਜਾਂਦੇ ਹਨ ਤੇ ਸੀਵਰੇਜ ਦਾ ਓਵਰਫ਼ਲੋ ਹੋ ਕੇ ਗਲੀਆਂ ਵਿੱਚ ਪਾਣੀ ਖਿਲਰਣਾ ਜਿਊਂ ਦਾ ਤਿਊਂ ਰਹਿੰਦਾ ਹੈ। ਉਨ੍ਹਾਂ ਕਿਹਾ ਕਿ ਜਿੱਥੇ ਮੀਂਹ ਦੇ ਦਿਨਾਂ ਵਿੱਚ ਇਹ ਸਮੱਸਿਆ ਸਾਰੇ ਬਜ਼ਾਰ ਤੇ ਆਮ ਵੱਸੋਂ ਨੂੰ ਆਪਣੀ ਲਪੇਟ ਵਿੱਚ ਲੈ ਲੈਂਦੀ ਹੈ। ਉੱਥੇ ਹੀ ਮੀਹਾਂ ਤੋਂ ਬਿਨ੍ਹਾਂ ਆਮ ਦਿਨਾਂ ਵਿੱਚ ਵੀ ਗਲੀਆਂ ’ਚੋਂ ਲੰਘਣ ਦੀ ਕੋਈ ਪੈਰ ਧਰਨ ਦੀ ਜਗ੍ਹਾ ਨਹੀਂ ਬਚਦੀ। ਉਨ੍ਹਾਂ ਕਿਹਾ ਕਿ ਬੇਸ਼ੱਕ ਵਾਰ ਵਾਰ ਇਸ ਮਸਲੇ ਦੇ ਹੱਲ ਦੀਆਂ ਕੋਸ਼ਿਸਾਂ ਕੀਤੀਆਂ ਗਈਆਂ, ਜੋ ਯੋਗ ਵਿਉਂਤਬੰਦੀ ਨਾ ਹੋਣ ਕਾਰਨ ਸਿਰੇ ਨਹੀਂ ਚੜ੍ਹ ਸਕੀਆਂ। ਸ਼ਹਿਰੀ ਪੰਜ ਸਾਲਾਂ ਤੋਂ ਇਸੇ ਵਰਤਾਰੇ ਨਾਲ ਜੂਝਦੇ ਰਹੇ। ਉਨ੍ਹਾਂ ਪੰਜਾਬ ਸਰਕਾਰ ਤੇ ਸੀਵਰੇਜ ਬੋਰਡ ਤੋਂ ਮੰਗ ਕੀਤੀ ਕਿ ਪਾਣੀ ਦੇ ਪੁਖਤਾ ਹੱਲ ਲਈ ਜਿੱਥੇ ਹੀ ਫੰਡਾਂ ਦਾ ਯੋਜਨਾਬੱਧ ਤਰੀਕੇ ਨਾਲ ਲਗਾਉਣਾ ਫ਼ੌਰੀ ਜ਼ਰੂਰੀ ਹੈ। ਉੱਥੇ ਹੀ ਪੰਜਾਬ ਵਿੱਚ ਕੰਪਨੀਆਂ ਵੱਲੋਂ ਭੇਜੇ ਜਾ ਰਹੇ ਰਹੇ ਪਲਾਸਟਿਕ ਪੌਲੀਥੀਨ ਲਿਫਾਫਿਆਂ ਤੇ ਪੂਰਨ ਪਾਬੰਧੀ ਲਗਾਉਣੀ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ ਜਿਸ ਤਰੀਕੇ ਪਰਾਲੀ ਫੂਕਣ ਤੇ ਰੋਕ ਲਗਾਉਣ ਦਾ ਫੈਸਲਾ ਸਰਕਾਰ ਨੇ ਸਖਤੀ ਨਾਲ ਲਿਆ ਹੈ, ਓਸੇ ਤਰੀਕੇ ਹੀ ਲਿਫ਼ਾਫ਼ੇ ਬਣਾ ਰਹੀਆਂ ਕੰਪਨੀਆਂ ਤੇ ਸ਼ਿਕੰਜਾ ਕੱਸਿਆ ਜਾਵੇ ਤੇ ਇਸਦੀ ਵਰਤੋਂ ਪੂਰਨ ਰੋਕ ਲਗਾਈ ਜਾਵੇ ਤਾਂ ਜੋ ਵਰਤੋਂ ਤੋਂ ਬਾਅਦ ਲਿਫਾਫੇ ਪਾਣੀ ਦੀ ਸਪਲਾਈ ਵਿੱਚ ਜਾਣ ਤੋਂ ਰੋਕੇ ਜਾ ਸਕਣ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਫੋਕੀ ਬਿਆਨਬਾਜ਼ੀ ਦੀ ਬਜਾਏ ਗਰਾਊਂਡ ਉਤੇ ਵਸਦੇ ਲੋਕਾਂ ਦੀਆਂ ਸਮੱਸਿਆਵਾਂ ਨੂੰ ਸਮਝਦੇ ਹੋਏ ਮਿਊਂਸੀਪਲ ਕਮੇਟੀ ਵੱਲੋਂ 37 ਕਰੋੜ ਦੇ ਪਾਸ ਕੀਤੇ ਗਏ ਮਤੇ ਉਪਰ ਗੌਰ ਕਰਕੇ ਜਲਦੀ ਫੰਡ ਜਾਰੀ ਕਰੇ ਤਾਂ ਜੋ ਸੀਵਰੇਜ ਬੋਰਡ ਇਸ ਨੂੰ ਸ਼ਹਿਰੀਆਂ ਦੀ ਮੰਗ ਮੁਤਾਬਿਕ ਪਾਣੀ ਦੇ ਯੋਗ ਹੱਲ ਲਈ ਵਰਤ ਸਕੇ। ਧਰਨੇ ਦੌਰਾਨ ਪੰਜਾਬ ਕਿਸਾਨ ਯੂਨੀਅਨ ਦੇ ਸੂਬਾ ਆਗੂ ਗੁਰਜੰਟ ਸਿੰਘ ਮਾਨਸਾ, ਜ਼ਿਲ੍ਹਾ ਮੀਤ ਪਰਧਾਨ ਇਕਬਾਲ ਸਿੰਘ ਫਫੜੇ, ਰਣਜੀਤ ਸਿੰਘ ਤਾਮਕੋਟ, ਸਹਿਰੀ ਆਗੂ ਸੁਖਚਰਨ ਦਾਨੇਵਾਲੀਆ, ਹਰਜਿੰਦਰ ਮਾਨਸਾਹੀਆ, ਕਰਨੈਲ ਸਿੰਘ ਮਾਨਸਾ, ਸੁਖਦੀਪ ਸਿੰਘ ਮਾਨਸਾ, ਮੱਖਣ ਸਿੰਘ ਮਾਨ, ਬਲਾਕ ਪਰਧਾਨ ਜਗਤਾਰ ਸਿੰਘ ਸਹਾਰਨਾ, ਜਸਪਾਲ ਸਿੰਘ ਉੱਭਾ, ਗੁਰਦੀਪ ਸਿੰਘ ਖਿਆਲਾ ਤੋਂ ਇਲਾਵਾ ਵਾਇਸ ਪਰਧਾਨ ਰਾਮਪਾਲ ਨਗਰ ਕੌਂਸਲ, ਐਡਵੋਕੇਟ ਬਲਕਰਨ ਸਿੰਘ ਬੱਲੀ, ਅੰਮ੍ਰਿਤਪਾਲ ਗੋਗਾ, ਹੰਸਾਂ ਸਿੰਘ, ਸਰਪੰਚ ਅਜੀਤ ਸਿੰਘ, ਅਮਰੀਕ ਸਿੰਘ ਮਾਨਸਾ, ਡਾ.ਧੰਨਾਂ ਮੱਲ ਗੋਇਲ, ਕਰਿਸਨ ਚੌਹਾਨ, ਮੇਜਰ ਸਿੰਘ ਦੂਲੋਵਾਲ, ਮਨਜੀਤ ਸਿੰਘ ਸੋਢੀ, ਮਨਜੀਤ ਸਿੰਘ ਮੀਹਾਂ, ਪੱਤਰਕਾਰ ਆਤਮਾ ਸਿੰਘ ਪਮਾਰ, ਗਗਨਦੀਪ ਸਰਮਾਂ, ਬਚਿੱਤਰ ਸਿੰਘ ਮੂਸਾ, ਅਵਤਾਰ ਸਿੰਘ ਮੰਡਾਲੀ, ਹਰਮਨ ਸਿੰਘ ਹੈਰੀ, ਕਾ.ਤੋਤਾ ਸਿੰਘ, ਕੁਲਵੰਤ ਸਿੰਘ ਮਾਨਸਾਹੀਆ, ਜਰਨੈਲ ਸਿੰਘ ਖਿਆਲਾ ਹਾਜ਼ਰ ਸਨ I