ਇੰਡੋਨੇਸ਼ੀਆ ਦੇ ਪੂਰਬੀ ਨੂਸਾ ਤੇਂਗਾਰਾ ‘ਚ 7.7 ਤੀਬਰਤਾ ਦੇ ਭੂਚਾਲ ਤੋਂ ਬਾਅਦ 14 ਦਿਨਾਂ ਦੀ ਐਮਰਜੈਂਸੀ

ਇੰਡੋਨੇਸ਼ੀਆ ਦੇ ਪੂਰਬੀ ਨੂਸਾ ਤੇਂਗਾਰਾ ਸੂਬੇ ਦੀ ਸਰਕਾਰ ਨੇ ਫਲੋਰਸ ਟਾਪੂ ‘ਤੇ ਆਏ 7.7 ਤੀਬਰਤਾ ਵਾਲੇ ਭੂਚਾਲ ਤੋਂ ਬਾਅਦ 14 ਦਿਨਾਂ ਦੀ ਐਮਰਜੈਂਸੀ ਪ੍ਰਤੀਕਿਰਿਆ ਦਾ ਐਲਾਨ ਕੀਤਾ ਹੈ। ਇਸ ਦੌਰਾਨ ਪ੍ਰਭਾਵਿਤ ਇਲਾਕਿਆਂ ਵਿੱਚ ਰਾਹਤ, ਬਚਾਅ, ਨਿਕਾਸੀ ਅਤੇ ਮੁੜ ਵਸੇਬੇ ਦੇ ਕੰਮਾਂ ਨੂੰ ਤੇਜ਼ ਕੀਤਾ ਜਾਵੇਗਾ। ਪੂਰਬੀ ਨੂਸਾ ਤੇਂਗਾਰਾ ਦੇ ਗਵਰਨਰ ਮੇਲਕੀ ਲਾਕਾ ਲੇਨਾ ਵੱਲੋਂ ਜਾਰੀ ਫ਼ਰਮਾਨ ਮੁਤਾਬਕ ਐਮਰਜੈਂਸੀ ਪ੍ਰਤੀਕਿਰਿਆ ਦੀ ਮਿਆਦ 15 ਅਗਸਤ ਤੋਂ 28 ਅਗਸਤ ਤੱਕ ਰਹੇਗੀ। ਫ਼ਰਮਾਨ ਵਿੱਚ ਦੱਸਿਆ ਗਿਆ ਹੈ ਕਿ ਭੂਚਾਲ ਦਾ ਕੇਂਦਰ ਨਾਗੇਕੇਓ ਰੀਜੈਂਸੀ ਵਿੱਚ ਐਮਬੇ ਤੋਂ ਲਗਭਗ 30 ਕਿਲੋਮੀਟਰ ਉੱਤਰ-ਪੂਰਬ ਵੱਲ 15 ਕਿਲੋਮੀਟਰ ਦੀ ਡੂੰਘਾਈ ‘ਤੇ ਸਥਿਤ ਸੀ। ਇੰਡੋਨੇਸ਼ੀਆ ਦੀ ਰਾਸ਼ਟਰੀ ਆਫ਼ਤ ਪ੍ਰਬੰਧਨ ਏਜੰਸੀ (BNPB) ਮੁਤਾਬਕ ਭੂਚਾਲ ਅਤੇ ਇਸ ਤੋਂ ਬਾਅਦ ਆਏ 341 ਝਟਕਿਆਂ ਕਾਰਨ ਹੁਣ ਤੱਕ 51 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਦਕਿ 113 ਹੋਰ ਜ਼ਖਮੀ ਹੋਏ ਹਨ। ਭੂਚਾਲ ਤੋਂ ਬਾਅਦ ਵੱਡੀ ਗਿਣਤੀ ਵਿੱਚ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ ਗਿਆ ਹੈ। ਸਿੱਕਾ ਵਿੱਚ 3,356, ਮੰਗਗਰਾਈ ਵਿੱਚ 2,078 ਅਤੇ ਨਾਗੇਕੇਓ ਵਿੱਚ 500 ਲੋਕ ਸ਼ਰਨ ਲੈ ਰਹੇ ਸਨ। ਇਸ ਤੋਂ ਇਲਾਵਾ ਬੀਮਾ ਅਤੇ ਸੇਲੇਅਰ ਵਿੱਚ ਵੀ ਲੋਕ ਬੇਘਰ ਹੋਏ ਹਨ। ਭੂਚਾਲ ਕਾਰਨ ਰਿਹਾਇਸ਼ੀ ਅਤੇ ਜਨਤਕ ਇਮਾਰਤਾਂ ਨੂੰ ਵੀ ਵੱਡਾ ਨੁਕਸਾਨ ਪਹੁੰਚਿਆ ਹੈ। ਕੁੱਲ 914 ਘਰਾਂ ਨੂੰ ਭਾਰੀ ਨੁਕਸਾਨ, 126 ਘਰਾਂ ਨੂੰ ਦਰਮਿਆਨਾ ਨੁਕਸਾਨ ਅਤੇ 317 ਘਰਾਂ ਨੂੰ ਹਲਕਾ ਨੁਕਸਾਨ ਹੋਇਆ ਹੈ। ਇਸ ਤੋਂ ਇਲਾਵਾ 93 ਵਿਦਿਅਕ ਸੰਸਥਾਵਾਂ, 36 ਸਿਹਤ ਸਹੂਲਤਾਂ ਅਤੇ 38 ਸਰਕਾਰੀ ਦਫ਼ਤਰਾਂ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ। ਸੂਬਾਈ ਸਰਕਾਰ ਮੁਤਾਬਕ ਐਮਰਜੈਂਸੀ ਪ੍ਰਤੀਕਿਰਿਆ ਦਾ ਮੁੱਖ ਉਦੇਸ਼ ਪ੍ਰਭਾਵਿਤ ਖੇਤਰਾਂ ਵਿੱਚ ਆਫ਼ਤ ਪ੍ਰਬੰਧਨ, ਲੋਕਾਂ ਦੀ ਨਿਕਾਸੀ, ਰਾਹਤ ਸਮੱਗਰੀ ਦੀ ਵੰਡ ਅਤੇ ਮੁੜ ਵਸੇਬੇ ਦੇ ਯਤਨਾਂ ਨੂੰ ਸੁਚਾਰੂ ਬਣਾਉਣਾ ਹੈ। ਸਿਨਹੂਆ ਨਿਊਜ਼ ਏਜੰਸੀ ਦੀ ਰਿਪੋਰਟ ਅਨੁਸਾਰ, ਗਵਰਨਰ ਮੇਲਕੀ ਲਾਕਾ ਲੇਨਾ ਨੇ ਸ਼ਨੀਵਾਰ ਨੂੰ ਕੁਪਾਂਗ ਵਿੱਚ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਦੱਸਿਆ ਕਿ ਭੂਚਾਲ ਤੋਂ ਬਾਅਦ ਜ਼ਮੀਨ ਖਿਸਕਣ ਕਾਰਨ ਕੁਝ ਸੜਕਾਂ ਕੱਟ ਗਈਆਂ ਜਾਂ ਆਵਾਜਾਈ ਲਈ ਬੰਦ ਹੋ ਗਈਆਂ ਹਨ। BNPB ਵੱਲੋਂ ਪ੍ਰਭਾਵਿਤ ਇਲਾਕਿਆਂ ਵਿੱਚ ਭੋਜਨ ਅਤੇ ਹੋਰ ਜ਼ਰੂਰੀ ਰਾਹਤ ਸਮੱਗਰੀ ਭੇਜੀ ਜਾ ਰਹੀ ਹੈ। ਇਸ ਵਿੱਚ ਪੂਰਬੀ ਫਲੋਰਸ ਰੀਜੈਂਸੀ ਵਿੱਚ ਸਥਿਤ ਇੱਕ ਲੌਜਿਸਟਿਕਸ ਵੇਅਰਹਾਊਸ ਤੋਂ ਭੇਜੀ ਜਾ ਰਹੀ ਸਪਲਾਈ ਵੀ ਸ਼ਾਮਲ ਹੈ। ਇਸ ਦੇ ਨਾਲ ਹੀ ਜਕਾਰਤਾ ਤੋਂ ਹਲੀਮ ਪਰਦਾਨਾਕੁਸੁਮਾ ਏਅਰ ਫੋਰਸ ਬੇਸ ਰਾਹੀਂ ਵੀ ਰਾਹਤ ਸਮੱਗਰੀ ਭੇਜੀ ਜਾ ਰਹੀ ਹੈ। ਭੂਚਾਲ ਤੋਂ ਬਾਅਦ ਪੂਰਬੀ ਨੂਸਾ ਤੇਂਗਾਰਾ ਸੂਬੇ ਵਿੱਚ ਕਈ ਉਡਾਣਾਂ ਵੀ ਰੱਦ ਕਰ ਦਿੱਤੀਆਂ ਗਈਆਂ ਹਨ, ਜਿਸ ਕਾਰਨ ਪ੍ਰਭਾਵਿਤ ਇਲਾਕਿਆਂ ਤੱਕ ਆਵਾਜਾਈ ਅਤੇ ਰਾਹਤ ਪਹੁੰਚਾਉਣ ਦੇ ਕੰਮਾਂ ‘ਤੇ ਵੀ ਅਸਰ ਪਿਆ ਹੈ। ਨਾਗੇਕੇਓ ਰੀਜੈਂਸੀ ਦੇ ਐਮਬੇ ਕਸਬੇ ਨੇੜੇ ਕੇਂਦਰਿਤ ਇਹ ਭੂਚਾਲ ਸ਼ਨੀਵਾਰ ਤੜਕੇ ਆਇਆ ਸੀ। ਭੂਚਾਲ ਤੋਂ ਬਾਅਦ ਸੁਨਾਮੀ ਦੀ ਚੇਤਾਵਨੀ ਜਾਰੀ ਕੀਤੀ ਗਈ ਸੀ, ਜਿਸ ਨੂੰ ਬਾਅਦ ਵਿੱਚ ਇੰਡੋਨੇਸ਼ੀਆ ਦੀ ਮੌਸਮ ਵਿਗਿਆਨ, ਜਲਵਾਯੂ ਵਿਗਿਆਨ ਅਤੇ ਭੂ-ਭੌਤਿਕ ਵਿਗਿਆਨ ਏਜੰਸੀ ਵੱਲੋਂ ਹਟਾ ਦਿੱਤਾ ਗਿਆ। ਇਸ ਦੌਰਾਨ ਬਚਾਅ ਅਤੇ ਰਾਹਤ ਟੀਮਾਂ ਪ੍ਰਭਾਵਿਤ ਇਲਾਕਿਆਂ ਵਿੱਚ ਮੌਜੂਦ ਹਨ ਅਤੇ ਜਾਨੀ ਨੁਕਸਾਨ ਦੇ ਨਾਲ-ਨਾਲ ਸੰਪਤੀ ਤੇ ਬੁਨਿਆਦੀ ਢਾਂਚੇ ਨੂੰ ਹੋਏ ਨੁਕਸਾਨ ਦਾ ਮੁਲਾਂਕਣ ਜਾਰੀ ਹੈ।