ਬੈਂਕ ਆਫ ਕੈਨੇਡਾ ਨੇ ਨਵੇਂ 20 ਡਾਲਰ ਦੇ ਨੋਟ ਦਾ ਡਿਜ਼ਾਈਨ ਜਾਰੀ ਕਰ ਦਿੱਤਾ ਹੈ, ਜੋ ਫਰਵਰੀ 2027 ਤੋਂ ਚਲਣ ਵਿੱਚ ਆਵੇਗਾ। ਇਹ ਕੈਨੇਡਾ ਦਾ ਪਹਿਲਾ ਬੈਂਕ ਨੋਟ ਹੋਵੇਗਾ ਜਿਸ ’ਤੇ ਕਿੰਗ ਚਾਰਲਸ ਤੀਜੇ ਦੀ ਤਸਵੀਰ ਹੋਵੇਗੀ। ਨਵਾਂ ਨੋਟ ਪੁਰਾਣੇ ਨੋਟਾਂ ਤੋਂ ਵੱਖਰੇ ਤੌਰ ’ਤੇ ਲੰਬਕਾਰੀ ਡਿਜ਼ਾਈਨ ਵਿੱਚ ਤਿਆਰ ਕੀਤਾ ਗਿਆ ਹੈ। ਇਸ ’ਤੇ ਕਿੰਗ ਚਾਰਲਸ ਦੀ ਤਸਵੀਰ ਮਹਾਰਾਣੀ ਐਲਿਜ਼ਾਬੈਥ ਦੂਜੀ ਦੀ ਥਾਂ ਲਈ ਹੈ। ਯਾਦ ਰਹੇ ਕਿ ਮਹਾਰਾਣੀ ਦੀ ਤਸਵੀਰ 1935 ਤੋਂ ਕੈਨੇਡਾ ਦੇ 18 ਵੱਖ-ਵੱਖ ਬੈਂਕ ਨੋਟਾਂ ’ਤੇ ਦਰਸਾਈ ਜਾਂਦੀ ਰਹੀ ਹੈ। ਨਵੇਂ ਨੋਟ ਦਾ ਡਿਜ਼ਾਈਨ ਕਿੰਗ ਚਾਰਲਸ ਦੀ ਮਈ 2023 ਵਿੱਚ ਹੋਈ ਤਾਜਪੋਸ਼ੀ ਤੋਂ ਕੁਝ ਸਮੇਂ ਬਾਅਦ ਤਿਆਰ ਕਰਨਾ ਸ਼ੁਰੂ ਕੀਤਾ ਗਿਆ ਸੀ। ਨੋਟ ਦੇ ਦੂਜੇ ਪਾਸੇ ਫਰਾਂਸ ਵਿੱਚ 1917 ਦੀ ਵਿਮੀ ਰਿਜ ਦੀ ਲੜਾਈ ਵਾਲੀ ਥਾਂ ’ਤੇ ਸਥਿਤ ਕੈਨੇਡੀਅਨ ਨੈਸ਼ਨਲ ਵਿਮੀ ਮੈਮੋਰੀਅਲ ਦੀ ਤਸਵੀਰ ਹੈ। ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਟਿਫ ਮੈਕਲਮ ਨੇ ਵਿਮੀ ਰਿਜ ਦੀ ਲੜਾਈ ਨੂੰ ਵਿਸ਼ਵ ਪੱਧਰ ’ਤੇ ਕੈਨੇਡੀਅਨ ਪ੍ਰਭੂਸੱਤਾ ਦਾ ਪ੍ਰਤੀਕ ਦੱਸਿਆ। ਯਾਦਗਾਰ ’ਤੇ 11,285 ਕੈਨੇਡੀਅਨ ਸੈਨਿਕਾਂ ਦੇ ਨਾਮ ਦਰਜ ਹਨ। ਨਵੇਂ ਪੌਲੀਮਰ ਨੋਟ ਵਿੱਚ ਨਕਲੀ ਨੋਟਾਂ ਨੂੰ ਰੋਕਣ ਲਈ ਆਧੁਨਿਕ ਸੁਰੱਖਿਆ ਤਕਨੀਕਾਂ ਅਤੇ 3ਡੀ ਪ੍ਰਭਾਵ ਵਾਲੇ ਡਿਜ਼ਾਈਨ ਸ਼ਾਮਲ ਹਨ। ਨੋਟ ਨੂੰ ਝੁਕਾਉਣ ’ਤੇ ਜਾਮਨੀ ਸੁਰੱਖਿਆ ਪੱਟੀ ਵਿੱਚ ਮੌਜੂਦ ਤਸਵੀਰਾਂ ਹਿਲਦੀਆਂ ਹੋਈਆਂ ਦਿਖਾਈ ਦਿੰਦੀਆਂ ਹਨ। ਇਸ ਤੋਂ ਇਲਾਵਾ, ਕਿੰਗ ਦੀ ਤਸਵੀਰ, ਵੱਡੇ ‘20’ ਅਤੇ ‘ਕੈਨੇਡਾ’ ਸ਼ਬਦ ’ਤੇ ਉੱਭਰੀ ਹੋਈ ਸਿਆਹੀ ਵਰਗੀਆਂ ਛੂਹ ਰਾਹੀਂ ਪਛਾਣੀਆਂ ਜਾਣ ਵਾਲੀਆਂ ਵਿਸ਼ੇਸ਼ਤਾਵਾਂ ਵੀ ਹਨ। ਨੋਟ ’ਤੇ ਕੈਨੇਡਾ ਦੇ 13 ਪ੍ਰੋਵਿੰਸਾਂ ਅਤੇ ਟੈਰੀਟਰੀਜ਼ ਨੂੰ ਉਨ੍ਹਾਂ ਦੇ ਫੁੱਲਾਂ ਦੇ ਪ੍ਰਤੀਕਾਂ ਰਾਹੀਂ ਦਰਸਾਇਆ ਗਿਆ ਹੈ। ਇਸ ਵਿੱਚ ਇੰਡੀਜੀਨਸ ਭਾਈਚਾਰਿਆਂ ਨਾਲ ਸੱਭਿਆਚਾਰਕ ਤੌਰ ’ਤੇ ਜੁੜੇ ਜੰਗਲੀ ਸਟ੍ਰਾਬੇਰੀ, ਵੈਸਟਰਨ ਰੈੱਡ ਸੀਡਰ, ਬ੍ਰੇਡਡ ਸਵੀਟਗ੍ਰਾਸ ਅਤੇ ਆਰਕਟਿਕ ਕਾਟਨ ਦੇ ਪੌਦੇ ਵੀ ਸ਼ਾਮਲ ਹਨ। ਬੈਂਕ ਨੇ ਨੋਟ ਦੀ ਮਜ਼ਬੂਤੀ ਦੀ ਜਾਂਚ ਲਈ ਇਸ ਨੂੰ ਵਾਸ਼ਿੰਗ ਮਸ਼ੀਨ ਅਤੇ ਡਰਾਇਰ ਵਿੱਚ ਪਾਉਣ ਤੋਂ ਇਲਾਵਾ ਉਬਾਲਣ ਅਤੇ ਵੱਖ-ਵੱਖ ਰਸਾਇਣਾਂ ਨਾਲ ਵੀ ਟੈਸਟ ਕੀਤਾ ਹੈ। ਅਧਿਕਾਰੀਆਂ ਮੁਤਾਬਕ, ਇਹ ਨੋਟ ਕੈਨੇਡਾ ਦੀ ਪਛਾਣ ਅਤੇ ਰਾਸ਼ਟਰੀ ਮੁੱਲਾਂ ਨੂੰ ਦਰਸਾਉਂਦਾ ਹੈ। ਬਦਲ ਰਹੇ ਆਰਥਿਕ ਹਾਲਾਤ ਅਤੇ ਅਮਰੀਕਾ ਨਾਲ ਵਪਾਰਕ ਤਣਾਅ ਦਰਮਿਆਨ, ਇਹ ਨੋਟ ਕੈਨੇਡਾ ਦੀਆਂ ਸੰਸਥਾਵਾਂ, ਮਜ਼ਦੂਰਾਂ ਅਤੇ ਕਾਰੋਬਾਰਾਂ ਦੀ ਮਜ਼ਬੂਤੀ ਦਾ ਪ੍ਰਤੀਕ ਵੀ ਹੈ।