ਈਟੋਬੀਕੋਕ ’ਚ ਸਿਆਸੀ ਬਰਫ਼ ਪਿਘਲੀ, ਪੀਜ਼ਾ ਟੇਬਲ ’ਤੇ ਕਾਰਨੀ–ਫੋਰਡ ਦੀ ਮੀਟਿੰਗ

ਟੋਰਾਂਟੋ, ਓਂਟਾਰੀਓ ਦੇ ਪ੍ਰੀਮੀਅਰ ਡਗ ਫੋਰਡ ਅਤੇ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਿਚਕਾਰ ਹਾਲੀਆ ਤਣਾਅ ਤੋਂ ਬਾਅਦ ਹੁਣ ਰਿਸ਼ਤਿਆਂ ਵਿੱਚ ਸੁਧਾਰ ਦੇ ਸਪਸ਼ਟ ਸੰਕੇਤ ਨਜ਼ਰ ਆ ਰਹੇ ਹਨ। ਸੋਮਵਾਰ ਨੂੰ ਦੋਵੇਂ ਨੇਤਾ ਈਟੋਬੀਕੋਕ ਦੀ ਇੱਕ ਪੀਜ਼ਾ ਸ਼ਾਪ ਵਿੱਚ ਇਕੱਠੇ ਪੀਜ਼ਾ ਖਾਂਦੇ ਹੋਏ ਖੁਸ਼ਗਵਾਰ ਮਾਹੌਲ ਵਿੱਚ ਮਿਲੇ। ਮੁਲਾਕਾਤ ਦੌਰਾਨ ਬਰਫ਼ੀਲੇ ਦਿਨ ਕਾਰਨ ਛੁੱਟੀ ’ਤੇ ਮੌਜੂਦ ਬੱਚਿਆਂ ਨਾਲ ਵੀ ਦੋਵੇਂ ਨੇਤਾਵਾਂ ਨੇ ਗੱਲਬਾਤ ਕੀਤੀ, ਜਿਸ ਨਾਲ ਸਥਾਨਕ ਲੋਕਾਂ ਵਿੱਚ ਵੀ ਚਰਚਾ ਰਹੀ। ਇਸ ਅਣੌਪਚਾਰਿਕ ਮਿਲਣੀ ਨੂੰ ਦੋਵਾਂ ਪੱਖਾਂ ਵੱਲੋਂ ਸਿਆਸੀ ਤਣਾਅ ਘਟਾਉਣ ਵੱਲ ਇੱਕ ਸਕਾਰਾਤਮਕ ਕਦਮ ਮੰਨਿਆ ਜਾ ਰਿਹਾ ਹੈ। ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਪ੍ਰੀਮੀਅਰ ਡਗ ਫੋਰਡ ਨੇ ਕਿਹਾ ਕਿ “ਅਸੀਂ ਟੀਮ ਕੈਨੇਡਾ ਹਾਂ। ਕਈ ਵਾਰ ਭਰਾ-ਭੈਣਾਂ ਵਿਚਕਾਰ ਅਸਹਿਮਤੀ ਹੋ ਸਕਦੀ ਹੈ, ਪਰ ਆਖ਼ਰਕਾਰ ਅਸੀਂ ਇੱਕ ਦੇਸ਼ ਹਾਂ।” ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਵੀ ਸਹਿਮਤੀ ਜਤਾਉਂਦਿਆਂ ਕਿਹਾ ਕਿ ਦੋਵੇਂ ‘ਟੀਮ ਕੈਨੇਡਾ’ ਦੇ ਤਹਿਤ ਪੂਰੀ ਤਰ੍ਹਾਂ ਇਕਜੁੱਟ ਹਨ। ਕਾਰਨੀ ਨੇ ਦੱਸਿਆ ਕਿ ਲਗਭਗ ਇੱਕ ਘੰਟੇ ਦੀ ਮੀਟਿੰਗ ਦੌਰਾਨ ਓਂਟਾਰੀਓ ਦੇ ਆਟੋ ਸੈਕਟਰ, ਮਹੱਤਵਪੂਰਨ ਖਣਿਜ, ਰਿੰਗ ਆਫ਼ ਫਾਇਰ ਅਤੇ ਊਰਜਾ ਵਿਕਾਸ ਵਰਗੇ ਅਹਿਮ ਮੁੱਦਿਆਂ ’ਤੇ ਗਹਿਰੀ ਚਰਚਾ ਹੋਈ। ਇਸ ਮੁਲਾਕਾਤ ਤੋਂ ਬਾਅਦ ਪ੍ਰੀਮੀਅਰ ਫੋਰਡ ਨੇ ਕਵੀਨਜ਼ ਪਾਰਕ ’ਚ ਫੈਡਰਲ ਉਦਯੋਗ ਮੰਤਰੀ ਮੇਲਾਨੀ ਜੋਲੀ ਨਾਲ ਵੀ ਮੀਟਿੰਗ ਕਰਨ ਦੀ ਯੋਜਨਾ ਬਣਾਈ।