ਬ੍ਰਿਟਿਸ਼ ਕੋਲੰਬੀਆ: ਗੋਲਡਨ ਇਅਰਜ਼ ’ਚ ਫਸੇ ਚਾਰ ਹਾਈਕਰ ਸੁਰੱਖਿਅਤ, RMSAR ਦੀ ਵੱਡੀ ਕਾਮਯਾਬੀ

ਮੇਪਲ ਰਿਜ ਦੇ ਉੱਤਰ ਵੱਲ ਗੋਲਡਨ ਇਅਰਜ਼ ਪਹਾੜੀ ਇਲਾਕੇ ਵਿੱਚ ਫਸੇ ਚਾਰ ਹਾਈਕਰਾਂ ਨੂੰ ਚਾਰ ਦਿਨਾਂ ਬਾਅਦ ਸੁਰੱਖਿਅਤ ਬਚਾ ਲਿਆ ਗਿਆ ਹੈ। ਰਿਜ ਮੀਡੋਜ਼ ਸਰਚ ਐਂਡ ਰੈਸਕਿਊ (RMSAR) ਵੱਲੋਂ ਚਲਾਈ ਗਈ ਇਸ ਮੁਹਿੰਮ ਨੂੰ ਮੌਸਮੀ ਚੁਣੌਤੀਆਂ ਦੇ ਬਾਵਜੂਦ ਸਫਲਤਾਪੂਰਕ ਅੰਜਾਮ ਦਿੱਤਾ ਗਿਆ।RMSAR ਮੁਤਾਬਕ, ਹਾਈਕਰ ਸ਼ਨੀਵਾਰ ਨੂੰ ਗੋਲਡਨ ਇਅਰਜ਼ ਦੀ ਚੋਟੀ ’ਤੇ ਪਹੁੰਚੇ ਸਨ, ਪਰ ਅਚਾਨਕ ਆਏ ਤੀਬਰ ਤੂਫ਼ਾਨ ਕਾਰਨ “ਵ੍ਹਾਈਟਆਊਟ” ਹਾਲਾਤ ਬਣ ਗਏ। ਦਿੱਖ ਬਹੁਤ ਘੱਟ ਹੋਣ ਕਾਰਨ ਉਹ ਅੱਗੇ ਵਧਣ ਵਿੱਚ ਅਸਮਰਥ ਰਹੇ ਅਤੇ ਪੈਨੋਰਾਮਾ ਰਿਜ ਸਥਿਤ ਐਮਰਜੈਂਸੀ ਸ਼ੈਲਟਰ ਤੱਕ ਪਹੁੰਚ ਕੇ ਉੱਥੇ ਪਨਾਹ ਲਈ। ਹਾਈਕਰਾਂ ਨੇ ਐਪਲ SOS ਸੇਵਾ ਰਾਹੀਂ ਮਦਦ ਲਈ ਸੰਪਰਕ ਕੀਤਾ।RMSAR ਦੇ ਪ੍ਰਧਾਨ ਬ੍ਰੈਂਟ ਬੂਲੇ ਨੇ ਦੱਸਿਆ ਕਿ ਘੱਟ ਦਿੱਖ ਅਤੇ ਹਿਮਸਖਲਨ ਦੇ ਖ਼ਤਰੇ ਕਾਰਨ ਤੁਰੰਤ ਰੈਸਕਿਊ ਕਰਨਾ ਸੰਭਵ ਨਹੀਂ ਸੀ। ਉਨ੍ਹਾਂ ਕਿਹਾ ਕਿ ਹਾਈਕਰ ਤਜਰਬੇਕਾਰ ਸਨ ਅਤੇ ਕੋਲ ਕੁਝ ਖਾਣ-ਪੀਣ ਦਾ ਸਾਮਾਨ ਮੌਜੂਦ ਸੀ, ਜਦਕਿ ਸ਼ੈਲਟਰ ਵਿੱਚ ਉਪਲਬਧ ਸਾਧਨਾਂ ਨੇ ਉਨ੍ਹਾਂ ਨੂੰ ਕਈ ਦਿਨਾਂ ਤੱਕ ਸੁਰੱਖਿਅਤ ਰੱਖਿਆ। ਮੌਸਮ ਸੁਧਰਨ ਉਪਰਾਂਤ ਹੈਲੀਕਾਪਟਰ ਰਾਹੀਂ ਰੈਸਕਿਊ ਅੰਜਾਮ ਦਿੱਤਾ ਗਿਆ ਅਤੇ ਸਾਰੇ ਹਾਈਕਰਾਂ ਨੂੰ ਸੁਰੱਖਿਅਤ ਪਿੱਟ ਮੀਡੋਜ਼ ਏਅਰਪੋਰਟ ਲਿਆਂਦਾ ਗਿਆ। ਇੱਥੇ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਨੇ ਉਨ੍ਹਾਂ ਦਾ ਸਵਾਗਤ ਕੀਤਾ। ਅਧਿਕਾਰੀਆਂ ਨੇ ਪਹਾੜੀ ਇਲਾਕਿਆਂ ਵਿੱਚ ਜਾਣ ਵਾਲਿਆਂ ਨੂੰ ਮੌਸਮੀ ਚੇਤਾਵਨੀਆਂ ਦੀ ਪਾਲਣਾ ਕਰਨ ਅਤੇ ਸੁਰੱਖਿਆ ਸਾਜ਼ੋ-ਸਾਮਾਨ ਨਾਲ ਜਾਣ ਦੀ ਅਪੀਲ ਕੀਤੀ ਹੈ।