ਲਾਪਰਵਾਹੀ ਨਾਲ ਡਰਾਈਵਿੰਗ: ਲੂਡੋ ਖੇਡਦੇ ਸਮੇਂ ਵਾਪਰਿਆ ਭਿਆਨਕ ਹਾਦਸਾ

ਕੈਨੇਡਾ ਵਿੱਚ ਮਾਂ ਅਤੇ ਧੀ ਨੂੰ ਟਰੱਕ ਨਾਲ ਕੁਚਲਣ ਦੇ ਮਾਮਲੇ ਵਿੱਚ ਇੱਕ ਪੰਜਾਬੀ ਮੂਲ ਦੇ ਡਰਾਈਵਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। 29 ਸਾਲਾ ਬਲਜੀਤ ਸਿੰਘ, ਜੋ ਕਿ ਕੈਨੇਡਾ ਦਾ ਨਾਗਰਿਕ ਹੈ, ‘ਤੇ ਲਾਪਰਵਾਹੀ ਨਾਲ ਡਰਾਈਵਿੰਗ ਕਰਦੇ ਹੋਏ ਇਹ ਭਿਆਨਕ ਹਾਦਸਾ ਕਰਨ ਦਾ ਦੋਸ਼ ਹੈ। ਇਸ ਘਟਨਾ ਵਿੱਚ ਮਾਂ ਅਤੇ ਧੀ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ ਸੀ, ਜਦਕਿ ਪਤੀ ਗੰਭੀਰ ਜ਼ਖਮੀ ਹੋਇਆ ਸੀ। ਇਹ ਹਾਦਸਾ 19 ਜੁਲਾਈ 2022 ਦੀ ਰਾਤ ਨੂੰ ਕੈਨੇਡਾ ਦੇ ਕਿਊਬੈਕ ਸੂਬੇ ਦੇ ਬ੍ਰੋਸਾਰਡ ਇਲਾਕੇ ਵਿੱਚ ਹਾਈਵੇਅ 30 ‘ਤੇ ਵਾਪਰਿਆ ਸੀ। 21 ਅਪ੍ਰੈਲ ਨੂੰ ਅਦਾਲਤੀ ਸੁਣਵਾਈ ਦੌਰਾਨ ਬਲਜੀਤ ਸਿੰਘ ਨੇ ਆਪਣਾ ਅਪਰਾਧ ਸਵੀਕਾਰ ਕਰ ਲਿਆ। ਉਸਨੂੰ ਸੰਭਾਵਿਤ ਤੌਰ ‘ਤੇ ਉਮਰ ਕੈਦ ਦੀ ਸਜ਼ਾ ਹੋ ਸਕਦੀ ਹੈ। ਅਦਾਲਤ ਵਿੱਚ ਉਸਨੇ ਮੰਨਿਆ ਕਿ ਉਹ ਗੱਡੀ ਚਲਾਉਂਦੇ ਸਮੇਂ ਆਪਣੇ ਮੋਬਾਈਲ ਫੋਨ ‘ਤੇ ਲੂਡੋ ਖੇਡ ਰਿਹਾ ਸੀ, ਜਿਸ ਕਾਰਨ ਉਸਦਾ ਧਿਆਨ ਭਟਕ ਗਿਆ ਅਤੇ ਟਰੱਕ ਨੇ ਅੱਗੇ ਜਾ ਰਹੀਆਂ ਵਾਹਨਾਂ ਨੂੰ ਟੱਕਰ ਮਾਰ ਦਿੱਤੀ। ਉਸਨੂੰ ਹੁਣ 4 ਜੂਨ 2026 ਨੂੰ ਸਜ਼ਾ ਸੁਣਾਈ ਜਾਵੇਗੀ। ਪੁਲਿਸ ਨੇ ਟਰੱਕ ਦੇ ਡੈਸ਼ਕੈਮ ਤੋਂ ਮਿਲੀ ਫੁਟੇਜ ਵੀ ਜ਼ਬਤ ਕੀਤੀ ਹੈ, ਜਿਸ ਵਿੱਚ ਉਸਨੂੰ ਗੇਮ ਖੇਡਦੇ ਹੋਏ ਦੇਖਿਆ ਗਿਆ ਹੈ। ਹਾਲਾਂਕਿ ਇਹ ਫੁਟੇਜ ਜਨਤਕ ਨਹੀਂ ਕੀਤੀ ਗਈ ਅਤੇ ਅਦਾਲਤ ਵਿੱਚ ਸਬੂਤ ਵਜੋਂ ਪੇਸ਼ ਕੀਤੀ ਗਈ ਹੈ। ਬਲਜੀਤ ਸਿੰਘ 53 ਫੁੱਟ ਲੰਬਾ ਟਰੈਕਟਰ-ਟ੍ਰੇਲਰ ਚਲਾ ਰਿਹਾ ਸੀ। ਸੜਕ ਨਿਰਮਾਣ ਕਾਰਨ ਟ੍ਰੈਫਿਕ ਹੌਲੀ ਚੱਲ ਰਿਹਾ ਸੀ, ਪਰ ਉਹ ਸਮੇਂ ‘ਤੇ ਬ੍ਰੇਕ ਨਹੀਂ ਲਗਾ ਸਕਿਆ। ਅਦਾਲਤੀ ਸਬੂਤਾਂ ਅਨੁਸਾਰ, ਹਾਦਸੇ ਤੋਂ ਇੱਕ ਘੰਟਾ ਪਹਿਲਾਂ ਉਸਨੇ ਆਪਣੇ ਫੋਨ ਦੀ 18 ਵਾਰ ਵਰਤੋਂ ਕੀਤੀ ਸੀ। ਟੱਕਰ ਦੇ ਸਮੇਂ ਉਹ ਫੋਨ ‘ਤੇ ਹੀ ਲੂਡੋ ਖੇਡ ਰਿਹਾ ਸੀ, ਜਿਸ ਕਾਰਨ ਟਰੱਕ ਸੱਤ ਵਾਹਨਾਂ ਨਾਲ ਟਕਰਾ ਗਿਆ। ਇਸ ਹਾਦਸੇ ਵਿੱਚ ਨੈਂਸੀ ਲੈਫਰੋਨ (42) ਅਤੇ ਉਸਦੀ 11 ਸਾਲਾ ਧੀ ਲੋਇਕ ਸ਼ੈਵਲੀਅਰ ਦੀ ਮੌਕੇ ‘ਤੇ ਮੌਤ ਹੋ ਗਈ, ਜਦਕਿ ਦਸ ਹੋਰ ਲੋਕ ਜ਼ਖਮੀ ਹੋਏ। ਪੁਲਿਸ ਰਿਪੋਰਟ ਮੁਤਾਬਕ, ਹਾਦਸੇ ਤੋਂ ਬਾਅਦ 20 ਜੁਲਾਈ 2022 ਨੂੰ ਬਲਜੀਤ ਨੂੰ ਹਸਪਤਾਲ ਤੋਂ ਛੁੱਟੀ ਮਿਲੀ ਸੀ। ਉਸਨੇ ਪੁਲਿਸ ਨੂੰ ਕਿਹਾ ਕਿ ਉਸਨੂੰ ਘਟਨਾ ਦੀ ਕੋਈ ਯਾਦ ਨਹੀਂ ਹੈ। ਉਸੇ ਦਿਨ ਦੁਪਹਿਰ 3:37 ਵਜੇ ਉਸਨੇ ਟਿਕਟ ਬੁੱਕ ਕੀਤੀ ਅਤੇ ਕੁਝ ਘੰਟਿਆਂ ਵਿੱਚ ਹੀ ਕੈਨੇਡਾ ਤੋਂ ਪੰਜਾਬ ਫਰਾਰ ਹੋ ਗਿਆ। ਬਾਅਦ ਵਿੱਚ ਉਹ ਭਾਰਤ ਅਤੇ ਫਿਰ ਕੈਲੀਫੋਰਨੀਆ ਚਲਾ ਗਿਆ। ਉਸਦੇ ਖ਼ਿਲਾਫ਼ ਜੁਲਾਈ 2023 ਵਿੱਚ ਅੰਤਰਰਾਸ਼ਟਰੀ ਵਾਰੰਟ ਜਾਰੀ ਕੀਤਾ ਗਿਆ ਸੀ। ਉਸਨੂੰ ਆਖ਼ਿਰਕਾਰ 21 ਅਗਸਤ 2025 ਨੂੰ ਅਮਰੀਕਾ ਦੇ ਕੈਲੀਫੋਰਨੀਆ ਵਿੱਚ ਸੰਘੀ ਏਜੰਟਾਂ ਨੇ ਗ੍ਰਿਫ਼ਤਾਰ ਕੀਤਾ ਅਤੇ ਸਤੰਬਰ 2025 ਵਿੱਚ ਕੈਨੇਡਾ ਹਵਾਲੇ ਕਰ ਦਿੱਤਾ ਗਿਆ। ਪੁਲਿਸ ਅਨੁਸਾਰ, ਬਲਜੀਤ ਸਿੰਘ ਮੂਲ ਰੂਪ ਵਿੱਚ ਪੰਜਾਬ ਦਾ ਰਹਿਣ ਵਾਲਾ ਹੈ ਅਤੇ ਓਨਟਾਰੀਓ ਦਾ ਨਾਗਰਿਕ ਹੈ।