ਕਬੱਡੀ ਪ੍ਰਮੋਰਟਰ ਕਤਲ ਮਾਮਲਾ: ਦੋ ਸ਼ੂਟਰਾਂ ਸਮੇਤ ਤਿੰਨ ਨਿਸ਼ਾਨੇ ਤੇ ਪਛਾਣ

ਕਬੱਡੀ ਪ੍ਰਮੋਰਟਰ ਕੰਵਰ ਦਿਗਵਿਜੈ ਸਿੰਘ ਉਰਫ ਰਾਣਾ ਬਲਾਚੌਰੀਆ ਕਤਲ ਕੇਸ ਵਿਚ ਪੁਲੀਸ ਨੇ ਦੋ ਸ਼ੂਟਰਾਂ ਸਣੇ ਤਿੰਨ ਵਿਅਕਤੀਆਂ ਦੀ ਪਛਾਣ ਕੀਤੀ ਹੈ। ਅੰਮ੍ਰਿਤਸਰ ਵਾਸੀ ਆਦਿੱਤਿਆ ਕਪੂਰ ਉਰਫ ਮੱਖਣ ਤੇ ਕਰਨ ਪਠਾਕ ਖਿਲਾਫ਼ ਕ੍ਰਮਵਾਰ 13 ਤੇ 2 ਕੇਸ ਦਰਜ ਹਨ। ਇਨ੍ਹਾਂ ਦਾ ਸਬੰਧ ਡੋਨੀ ਬਲ ਤੇ ਲੱਕੀ ਪਟਿਆਲ ਗਰੋਹ ਨਾਲ ਹੈ। ਉਂਝ ਅਜੇ ਤੱਕ ਇਸ ਕੇਸ ਵਿਚ ਕੋਈ ਗ੍ਰਿਫ਼ਤਾਰੀ ਨਹੀਂ ਹੋਈ ਹੈ।

ਪੁਲੀਸ ਨੇ ਦਾਅਵਾ ਕੀਤਾ ਕਿ ਕਤਲ ਦੀ ਵਜ੍ਹਾ ਕਬੱਡੀ ਟੂਰਨਾਮੈਂਟਾਂ ਦੇ ਆਯੋਜਨ ਵਿੱਚ ਦਬਦਬੇ ਨੂੰ ਲੈ ਕੇ ਝਗੜਾ ਸੀ। ਤੀਜੇ ਵਿਅਕਤੀ ਦੀ ਪਛਾਣ ਹੁਣ ਤੱਕ ਗੁਪਤ ਰੱਖੀ ਗਈ ਹੈ। ਪੁਲੀਸ ਨੇ ਹਮਲਾਵਰਾਂ ਨੂੰ ਪਨਾਹ ਅਤੇ ਲੌਜਿਸਟਿਕਸ ਪ੍ਰਦਾਨ ਕਰਨ ਵਿੱਚ ਸ਼ਾਮਲ ਕੁਝ ਵਿਅਕਤੀਆਂ 'ਤੇ ਵੀ ਨਜ਼ਰ ਰੱਖੀ ਹੈ। ਪੁਲੀਸ ਨੇ ਕਿਹਾ ਕਿ ਇਹ ਗਿਣਮਿਥ ਕੇ ਕੀਤਾ ਹਮਲਾ ਸੀ।

 

ਸੂਤਰਾਂ ਨੇ ਦੱਸਿਆ ਕਿ ਪੀੜਤ (ਕੰਵਰ ਦਿਗਵਿਜੈ ਸਿੰਘ) ਕੱਲ੍ਹ ਹੀ ਮੁਹਾਲੀ ਪਹੁੰਚਿਆ ਸੀ। ਪਰਿਵਾਰਕ ਮੈਂਬਰਾਂ ਨੇ ਦੋਸ਼ ਲਗਾਇਆ ਕਿ ਘਟਨਾ ਤੋਂ ਬਾਅਦ ਪੀੜਤ ਦਾ ਹਥਿਆਰ, ਮੋਬਾਈਲ ਫੋਨ ਅਤੇ ਇੱਕ ਸੋਨੇ ਦੀ ਚੇਨ ਗਾਇਬ ਹੈ।

ਮ੍ਰਿਤਕ ਨੂੰ ਸਿਰਫ਼ ਕਬੱਡੀ ਟੂਰਨਾਮੈਂਟ ਸੰਗਠਨ ਵਿੱਚ ਦਬਦਬਾ ਬਣਾਉਣ ਲਈ ਜੱਗੂ ਭਗਵਾਨਪੁਰੀਆ ਗੈਂਗ ਨਾਲ ਜੋੜਿਆ ਜਾ ਰਿਹਾ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਹੁਣ ਤੱਕ ਮੂਸੇਵਾਲਾ ਕਤਲ ਕੇਸ ਵਿੱਚ ਉਸ ਦੀ ਕੋਈ ਭੂਮਿਕਾ ਨਹੀਂ ਹੈ।

ਮੁਹਾਲੀ ਦੇ ਐਸਐਸਪੀ ਹਰਮਨਦੀਪ ਸਿੰਘ ਹੰਸ ਨੇ ਕਿਹਾ, ‘‘ਦਿੱਲੀ ਅਤੇ ਅੰਮ੍ਰਿਤਸਰ ਵਿੱਚ ਦੋ ਟੀਮਾਂ ਨਾਲ 12 ਪੁਲੀਸ ਟੀਮਾਂ ਜਾਂਚ ਵਿਚ ਜੁਟੀਆਂ ਹਨ। ਮ੍ਰਿਤਕ ਕੰਵਰ ਦਿਗਵਿਜੈ ਸਿੰਘ ਦਾ ਸਿੱਧੂ ਮੂਸੇਵਾਲਾ ਕਤਲ ਕੇਸ ਨਾਲ ਕੋਈ ਸਬੰਧ ਨਹੀਂ ਹੈ।’’

ਅਮਨ ਕਾਨੂੰਨ ਦੀ ਸਥਿਤੀ ਵਿੱਚ ਨਿਘਾਰ ਦੇ ਵਿਰੋਧੀ ਆਗੂਆਂ ਦੇ ਦਾਅਵੇ ’ਤੇ ਹੰਸ ਨੇ ਕਿਹਾ, ‘‘ਕਤਲ ਦੀ ਇੱਕ ਘਟਨਾ ਦਾ ਮਤਲਬ ਅਮਨ ਕਾਨੂੰਨ ਦੀ ਸਥਿਤੀ ਵਿੱਚ ਗਿਰਾਵਟ ਨਹੀਂ ਹੈ। ਪਿਛਲੇ ਸਾਰੇ ਮਾਮਲੇ ਹੱਲ ਹੋ ਚੁੱਕੇ ਹਨ।’’