ਐਕਸਟੋਰਸ਼ਨ ਸੰਕਟ ਦੇ ਬਾਵਜੂਦ ਸਰੀ ਪੁਲਿਸ ਬਜਟ ‘ਚ ਕਟੌਤੀ

ਫ੍ਰੇਜ਼ਰ ਵੈਲੀ ਵਿੱਚ ਵਧ ਰਹੇ ਜਬਰਨਵਸੂਲੀ (ਐਕਸਟੋਰਸ਼ਨ) ਦੇ ਮਾਮਲਿਆਂ ਦੇ ਦਰਮਿਆਨ ਸਰੀ ਸਿਟੀ ਨੇ ਪੁਲਿਸ ਬਜਟ ਵਿੱਚ ਕਟੌਤੀ ਕਰਕੇ ਨਵਾਂ ਬਜਟ ਮਨਜ਼ੂਰ ਕਰ ਦਿੱਤਾ ਹੈ। ਸਿਟੀ ਕੌਂਸਲ ਵੱਲੋਂ 284.5 ਮਿਲੀਅਨ ਡਾਲਰ ਦਾ ਬਜਟ ਪਾਸ ਕੀਤਾ ਗਿਆ, ਜੋ ਪਿਛਲੇ ਸਾਲ ਨਾਲੋਂ 45 ਮਿਲੀਅਨ ਡਾਲਰ ਵੱਧ ਹੈ, ਪਰ ਪੁਲਿਸ ਬੋਰਡ ਦੀ ਵੱਡੀ ਮੰਗ ਨਾਲੋਂ ਕਾਫ਼ੀ ਘੱਟ ਹੈ। Surrey Police Service ਦੇ ਪੁਲਿਸ ਬੋਰਡ ਵੱਲੋਂ ਲਗਭਗ 91 ਮਿਲੀਅਨ ਡਾਲਰ ਵਾਧੇ ਦੀ ਮੰਗ ਕੀਤੀ ਗਈ ਸੀ, ਜਿਸਨੂੰ ਪੂਰੀ ਤਰ੍ਹਾਂ ਮਨਜ਼ੂਰ ਨਹੀਂ ਕੀਤਾ ਗਿਆ। ਇਸ ਫੈਸਲੇ ਤੋਂ ਬਾਅਦ ਪੁਲਿਸ ਯੂਨੀਅਨ ਨੇ ਚਿੰਤਾ ਜਤਾਈ ਹੈ ਕਿ ਘਟੇ ਬਜਟ ਨਾਲ ਮੈਦਾਨੀ ਪੱਧਰ ‘ਤੇ ਪੁਲਿਸ ਕਰਮਚਾਰੀਆਂ ਦੀ ਗਿਣਤੀ ਪ੍ਰਭਾਵਿਤ ਹੋ ਸਕਦੀ ਹੈ। ਪੁਲਿਸ ਯੂਨੀਅਨ ਦੇ ਪ੍ਰਧਾਨ ਰਾਇਨ ਬੁਹਰਿਗ ਨੇ ਕਿਹਾ ਕਿ ਜਦੋਂ ਜਬਰਨਵਸੂਲੀ ਦੀਆਂ ਧਮਕੀਆਂ ਵਧ ਰਹੀਆਂ ਹਨ ਅਤੇ ਪੁਲਿਸ ‘ਤੇ ਵਾਧੂ ਜ਼ਿੰਮੇਵਾਰੀਆਂ ਹਨ, ਉਸ ਵੇਲੇ ਲਗਭਗ 47 ਮਿਲੀਅਨ ਡਾਲਰ ਦੀ ਕਟੌਤੀ ਕਰਨਾ ਗੈਰ-ਜਿੰਮੇਵਾਰਾਨਾ ਕਦਮ ਹੈ। ਉਨ੍ਹਾਂ ਨੇ ਚੇਤਾਵਨੀ ਦਿੱਤੀ ਕਿ ਇਸ ਨਾਲ ਜਨਤਕ ਸੁਰੱਖਿਆ ‘ਤੇ ਅਸਰ ਪੈ ਸਕਦਾ ਹੈ। ਦੂਜੇ ਪਾਸੇ, ਸਰੀ ਦੀ ਮੇਅਰ ਬ੍ਰੈਂਡਾ ਲੌਕ ਨੇ ਪਹਿਲਾਂ ਇਸ ਪ੍ਰਸਤਾਵਿਤ ਬਜਟ ਨੂੰ “ਬੇਹੱਦ ਵੱਧ” ਕਰਾਰ ਦਿੱਤਾ ਸੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਜੇ ਇਹ ਮੰਗ ਮਨਜ਼ੂਰ ਕੀਤੀ ਜਾਂਦੀ ਤਾਂ ਨਿਵਾਸੀਆਂ ‘ਤੇ ਕਰੀਬ 18 ਫ਼ੀਸਦੀ ਪ੍ਰਾਪਰਟੀ ਟੈਕਸ ਵਾਧਾ ਲਾਗੂ ਕਰਨਾ ਪੈਂਦਾ। ਅਧਿਕਾਰੀਆਂ ਅਨੁਸਾਰ, ਨਵਾਂ ਬਜਟ ਜਨਤਕ ਸੁਰੱਖਿਆ ਅਤੇ ਟੈਕਸ ਦੇ ਬੋਝ ਵਿਚਕਾਰ ਸੰਤੁਲਨ ਬਣਾਉਣ ਲਈ ਤਿਆਰ ਕੀਤਾ ਗਿਆ ਹੈ। 2021 ਤੋਂ ਹੁਣ ਤੱਕ ਪੁਲਿਸ ਬਜਟ ਵਿੱਚ ਕੁੱਲ 100 ਮਿਲੀਅਨ ਡਾਲਰ ਦਾ ਵਾਧਾ ਹੋ ਚੁੱਕਾ ਹੈ, ਜਿਸ ਨਾਲ ਸੁਰੱਖਿਆ ਢਾਂਚੇ ਨੂੰ ਮਜ਼ਬੂਤ ਕਰਨ ਦੀ ਕੋਸ਼ਿਸ਼ ਜਾਰੀ ਹੈ।